CORC BUŞ PREZİDENT SƏLAHİYYƏTLƏRİNİN İCRASINA YARARLI SAYILMIŞDIR
AZƏRTAC xəbər verir ki, Röyter agentliyinin yaydığı məlumata görə, ABŞ Prezidenti Corc Buş bu yaşda adam üçün gözəl formadadır və dövlət başçısı vəzifələrinin icrasına tamamilə yararlıdır. Fəaliyyətdə olan Prezidenti hər il müayinə edən ABŞ Hərbi Dəniz Qüvvələri Tibb Mərkəzinin həkimləri bu qənaətə gəlmişlər. Müayinənin nəticələrini Ağ ev açıqlamışdır.
Həkim rəyində deyilir ki, Corc Buşun sağlamlığının bütün əsas parametrləri ötən ilin avqustunda keçirilən müayinədən bəri, əslində, dəyişməmişdir.
Lakin Assoşieyted Press agentliyinin yaydığı məlumata əsasən, müayinənin nəticələri açıqlanandan sonra məlum olmuşdur ki, C.Buş bir neçə ay əvvəl gənəli borrelioz - Laym xəstəliyindən müalicə olunmuşdur. Müalicə barədə ictimaiyyətə xəbər verilməmişdir.
Ağ evin rəsmi nümayəndəsi demişdir ki, bu, ciddi xəstəlik olmadığına görə müalicə kursu barədə ictimaiyyətə məlumat verilməmişdir. Bundan əlavə, müalicə haqqında məlumat, onsuz da, Prezidentin sağlamlığı haqqında illik hesabata daxil ediləcəkdir. Ona görə də ayrıca məlumata ehtiyac yox idi.
Bölmənin digər xəbərləri
