Daşkənddə TRASEKA hökumətlərarası komissiyanın ikinci illik konfransı başa çatmışdır.

Konfransın işində Azərbaycan, Bolqarıstan, Gürcüstan, Ermənistan, Qazaxıstan, Qırğızıstan, Moldova, Rumıniya, Tacikistan, Türkmənistan, Türkiyə, Ukrayna və Özbəkistanın hökumət nümayəndə heyətləri, beynəlxalq təşkilatların nümayəndələri iştirak etmişlər. Azərbaycanı bu konfransda baş nazirin müavini Abid Şərifovun başçılığı ilə nümayəndə heyəti təmsil etmişdir.

Konfransın əvvəlində Özbəkistan baş nazirinin müavini Rüstəm Yunusov ölkə prezidenti İslam Kərimovun konfrans iştirakçılarına təbrikini oxumuşdur.

Avropa Komissiyasının nümayəndəsi P.Knudsen qeyd etmişdir ki, TRASEKA layihəsi öz inkişafının mühüm dövrünə qədəm qoyur.

Konfransda son bir il ərzində görülən işlərə yekun vurulmuş, görüləcək işlərin detalları razılaşdırılmışdır. Əfqanıstana humanitar yüklərin və inşaat materiallarının maneəsiz çatdırılması diqqət mərkəzində olmuşdur. Deyilmişdir ki, TRASEKA proqramı fəaliyyətə başlayandan bəri 46 layihədən istifadə olunmuşdur. Onun otuz üçü texniki, on üçü isə investisiya layihələridir.

Abid Şərifov öz çıxışında TRASEKA proqramı ilə bağlı Azərbaycanda görülən işlərdən danışaraq demişdir: - TRASEKA proqramının fəaliyyəti ilə bağlı Azərbaycana 12 milyon yevro investisiya qoyulub. Avtomobil və dəmir yolları, körpülər təmir edilib. Bakıda gücü 10 milyon tona çatan yeni neftboşaltma limanı işə düşüb. Əgər 1999-cu ildə TRASEKA dəhlizi ilə 4,8 milyon ton yük daşınmışdısa, 2000-ci və 2001-ci illərdə bu rəqəmlər müvafiq olaraq 5,2 və 8,7 milyon ton təşkil etmişdir.

Konfransda təşkilat məsələlərinə də baxılmışdır. Bir il ərzində sədrlik Özbəkistana həvalə edilmiş,Özbəkistanın nümayəndəsi Əbdürrəşid Tahirov TRASEKA-nın baş katibi, Gürcüstanın nümayəndəsi Z.Tiradze icraçı katib seçilmişlər.

Konfransın sonunda yekun rəsmi məlumatı və Daşkənd bəyannaməsi qəbul olunmuşdur.

Qulu Kəngərli

AZƏRTAC-ın xüsusi müxbiri

Daşkənd