Mayin 7-də Daxili İşlər Nazirliyində quldurluq və soyğunçuluq cinayətləri ilə mübarizənin vəziyyəti ilə bağlı Kollegiya iclası keçirilmişdir.

Kollegiya iclasını giriş sözü ilə açan Azərbaycan Respublikasının daxili işlər naziri, general-polkovnik Ramil Usubov qeyd etmişdir ki, daxili işlər orqanlarının əməkdaşları cinayətkarlığa qarşı mübarizədə qanunvericilik aktlarını, ölkəmizin Prezidenti cənab Heydər Əliyevin fərman, sərəncam və tövsiyələrini rəhbər tutaraq, cinayətlərin və digər hüquqpozmaların qarşısının alınması, şəxsiyyətin, insan hüquq və azadlıqlarının, mülkiyyətin hüquqazidd əməllərdən qorunması sahəsində bütün lazımi tədbirləri həyata keçirirlər. Bu yöndə son illər respublika ərazisində kriminogen duruma öz təsirini göstərən quldurluq, soyğunçuluq cinayətlərinin qarşısının alınması və açılması işinin gücləndirilməsinə dair bir sıra kompleks əməliyyat-axtarış, istintaq və profilaktiki tədbirlər hazırlanaraq icraçı təmin edilmişdir. Nəticədə Bakı, Gəncə, Sumqayıt, Mingəçevir şəhərlərində, Bərdə, Kürdəmir, Goranboy, Beyləqan, Masallı və digər rayonlarda quldurluq və soyğunçuluq cinayətləri törətmiş bir sıra təhlükəli cinayətkar qruplar ifşa edilmiş, vətəndaşlara dəymiş maddi ziyanın bir hissəsinin ödətdirilməsi təmin edilmişdir.

O da qeyd olunmuşdur ki, əldə edilmiş müsbət göstəricilərə baxmayaraq, bəzi şəhər və rayonlarda bu növ cinayətlərin açılması sahəsində aparılan əməliyyat-axtarış tədbirləri qeyri-qənaətbəxş sayılmalıdır.

Müzakirə edilən məsələ ilə bağlı Baş Cinayət-Axtarış İdarəsinin rəisi, polis general-mayoru Zakir Nəsirov və Baş İstintaq və Təhqiqat İdarəsinin rəisi, polis polkovniki Sərvər Mehrəliyevin məruzələri dinlənilmişdir. Məlumat verilmişdir ki, əməliyyat və istintaq xidmətlərinin qarşılıqlı əlaqəsinin səmərəli təşkili cinayətlərin qarşısının alınması, açılması və təqsirli şəxslərin ifşa edilib məsuliyyətə cəlb olunmasında, axtarışda olan şəxslərin tutulmasında öz müsbət təsirini göstərmişdir. Respublikanın bir çox polis orqanlarının istintaq aparatlarında çoxepizodlu, mürəkkəb cinayət işlərinin istintaqı nəticəsində uzun müddət fəaliyyət göstərən bir neçə mütəşəkkil quldur dəstəsi aşkar edilmiş, cinayət işləri yüksək peşəkarlıqla və keyfiyyətlə istintaq edilərək məhkəmələrə göndərilmiş, təqsirləndirilən şəxslər barəsində ittiham hökmləri çıxarılmışdır. Quldurluq və soyğunçuluq cinayətlərinin vaxtında açılması, eyni zamanda bayır xidmətləri, istintaq və əməliyyat xidmətləri arasındakı əlaqələrin Daxili İşlər Nazirliyinin tələbləri səviyyəsində, qabaqlayıcı və profilaktiki tədbirlərin ixtisaslı təşkili nəticəsində mümkün olmuşdur.

Natiqlər bunu xüsusi olaraq qeyd etmişlər ki, son vaxtlar Daxili İşlər Nazirliyində aparılan islahatlar, əməliyyat xidməti fəaliyyətinin təkmilləşdirilməsi istiqamətində görülmüş təşkilati-praktiki tədbirlər cinayətkarlıqla mübarizədə, xüsusən də əməliyat-istintaq aparatının birgə işinin səmərəliliyinin artırılmasında mühüm rol oynamışdır.

X x x

Kollegiya iclasından sonra Nazirliyin Mərkəzi Aparatının Baş İdarə, İdarə, Şöbə, Bölmə rəislərinin və onların müavinlərinin iştirakı ilə idarəçilik, təşkilatçılıq, icra intizamının, vətəndaşların müraciətlərinə baxılması işinin, xidməti ezamiyyətlərin təşkili və səmərəliliyinin vəziyyətinə dair əməliyyat müşavirəsi keçirilmişdir.

Müşavirəni giriş sözü ilə daxili işlər naziri Ramil Usubov açmış, bu məsələnin son bir neçə ildə ilk dəfə olaraq naziryanı əməliyyat müşavirəsində müzakirə edilməsinin böyük əhəmiyyətini qeyd etmişdir.

Baş Təşkilati-İnspektor İdarəsinin rəisi, polis polkovniki Fazil Quliyev göstərilən məsələ ilə bağlı məruzə ilə çıxış etmişdir.

Müşavirə iştirakçılarının diqqətinə çatdırılmışdır ki, 2001-ci ildə və bu ilin birinci rübündə DİN rəhbərliyi tərəfindən təşkilatçılıq fəaliyyətinin, nəzarət mexanizminin, normativ-hüquqi bazanın təkmilləşdirilməsi, şəhər-rayon polis orqanlarındakı vəziyyətə Mərkəzi Aparatın idarəçilik təsirinin yüksəldilməsi məqsədilə lazımi tədbirlər görülmüş, xidməti və icra intizamının möhkəmləndirilməsi üçün tələbkarlıq artırılmış və bütün bunlar Nazirliyin əmrlərinin, Kollegiya qərarlarının və göstərişlərinin yerinə yetirilməsində nəzərəçarpacaq dəyişikliklərə səbəb olmuşdur.

Məqsədyönlü normayaradıcılıq, əməliyyat-xidməti fəaliyyətin təkmilləşdirilməsi, nəzarət və tələbkarlığın artırılması sahəsində görülən tədbirlər respublikada kriminogen duruma və son illər cinayətkarlıqla mübarizədə ardıcıl olaraq uğurlar əldə edilməsinə müsbət təsir göstərmişdir.

Vətəndaşların təkliflərinə, ərizə və şikayətlərinə baxılmasının təşkili yönümündə də bir sıra zəruri işlər görülmüş, onların qəbulu ilə əlaqədar aparılan işə nəzarəti həyata keçirmək üçün müvafiq komissiyalar yaradılmış, yoxlanılan xidmətlərdə vətəndaşların müraciətlərinə baxılmasının və onların qəbulu təcrübəsinin təhlili və ümumiləşdirilməsinə dair konkret tədbirlər həyata keçirilmişdir.

Xidməti ezamiyyətin təşkili və səmərəliliyinin artırılması sahəsində görülmüş işlər barəsində də müşavirə iştirakçılarına geniş məlumat verilmişdir.

Kollegiya iclasına və əməliyyat müşavirəsinə yekun vuran daxili işlər naziri, general-polkovnik Ramil Usubov müzakirəyə çıxarılmış məsələlər barədə danışarkən qeyd etmişdir ki, möhtərəm Prezidentimiz cənab Heydər Əliyevin hakimiyyətə qayıdışından sonra ölkə həyatının bütün sahələrində, o cümlədən dövlət idarəetmə aparatının təkmilləşdirilməsi, insan hüquq və azadlıqlarının qorunması və cəmiyyətin demokratikləşdirilməsi, Avropa standartları səviyyəsinə çatdırılması istiqamətində həyata keçirilən islahatlar Daxili İşlər Nazirliyində, o cümlədən onun Mərkəzi Aparatının fəaliyyətində də öz həlledici rolunu oynamışdır. Sevindirici haldır ki, DİN dövlətçiliyimizin möhkəmləndirilməsi, hüquqi dövlət quruculuğu, vətəndaş cəmiyyəti formalaşdırılması prosesinə öz töhfəsini vermiş və bu, möhtərəm Prezidentimiz Heydər Əliyev tərəfindən həmişə yüksək qiymətləndirilmişdir.

Daxili işlər naziri belə diqqətin, inamın və tələbkarlığın xidməti fəaliyyətin bu istiqamətində də yeni-yeni uğurlarla nəticələnməsi üçün DİN-in hər cür imkanı olduğunu vurğulamış, eyni zamanda mövcud nöqsanların aradan qaldırılması yollarını göstərərək, polis orqanlarının rəhbərlərindən arxayınlaşmamağı, çatışmazlıqların aradan qaldırılması üçün var qüvvələrini sərf etmələrini tələb etmişdir.