DƏNİZ SƏRHƏDÇİLƏRİ DÖVLƏT SƏRHƏD XİDMƏTİNİN İLDÖNÜMÜNÜ QEYD ETDİLƏR
Dövlət himninin səslənməsi ilə açılan mərasimdə dəstənin komandiri, birinci dərəcəli kapitan Nəsrəddin Quliyev çıxış edərək, Azərbaycan Respublikasının Prezidenti, Silahlı Qüvvələrin Ali Baş Komandanı Heydər Əliyevin 2002-ci il iyulun 31-də Dövlət Sərhəd Xidmətinin yaradılması haqqında imzaladığı Fərmanı müstəqil Azərbaycanın Silahlı Qüvvələrinin qurulmasında mühüm hadisə kimi qiymətləndirmişdir. O demişdir ki, Dövlət Sərhəd Xidmətinin yaradılması beynəlxalq terrorizmə, kütləvi qırğın silahlarının yayılmasına, narkotik maddələrin və silah-sursatın qanunsuz daşınmasına, qaçaqmalçılığa qarşı mübarizə, dəniz sərhədlərini möhkəmləndirmək sahəsində sərhədçilər qarşısında yeni mühüm vəzifələr qoymuşdur. Əfqanıstan, İraq, Şimali Qafqaz kimi gərginlik nöqtələrinin dövlət sərhədlərimizin yaxınlığında yerləşməsi xidməti fəaliyyətdə daha sayıq olmağı tələb edir. Natiq bildirmişdir ki, Dəniz Sərhəd Gözətçi Gəmilər Dəstəsinin ən mühüm vəzifələrindən biri də Xəzər dənizində ölkəmizin strateji maraqlarının qorunmasıdır.
N. Quliyev Dəniz Sərhəd Gözətçi Gəmilər Dəstəsinin inkişafına və dəniz sərhədlərimizin mühafizəsinin beynəlxalq standartlara uyğun təşkil edilməsinə DSX-nin rəhbərliyi tərəfindən xüsusi diqqət yetirildiyini, gözətçi gəmilərin sayının artırıldığını da vurğulamışdır. O, Ali Baş Komandanı, DSX-nin rəhbərliyini əmin etmişdir ki, Dəniz Sərhəd Gözətçi Gəmilər Dəstəsi Azərbaycanın dəniz sərhədlərinin etibarlı qorunması üçün bütün imkanlardan istifadə edəcəkdir.
Mərasim konsert proqramı ilə başa çatmışdır.
