DÖVLƏT GÖMRÜK KOMİTƏSİ MƏTBUAT XİDMƏTİNİN M Ə L U M A T I
Xəbər verdiyimiz kimi, bu yaxınlarda Bakı şəhərində keçirilən Azərbaycan Respublikası ilə Rusiya Federasiyası arasında iqtisadi əməkdaşlıq üzrə hökumətlərarası birgə komissiyanın altıncı iclasında digər məsələlərlə yanaşı sərhəd və gömrük xidmətlərinin qarşılıqlı fəaliyyəti də müzakirə olunmuş, Azərbaycan Respublikası Dövlət Gömrük Komitəsi və Rusiya Federasiyası Dövlət Gömrük Komitəsi arasında “Mədəni sərvətlərin qanunsuz aparılması və gətirilməsi ilə mübarizədə əməkdaşlıq haqqında”, həmçinin “xarici ticarətin gömrük statistikası sahəsində metodoloji və informasiya əməkdaşlığı haqqında” protokollar imzalanmışdır.
Mayın 7-də Dövlət Gömrük Komitəsinin sədri Kəmaləddin Heydərov və Rusiya Federasiyası Dövlət Gömrük Komitəsinin sədri Mixail Vanin Azərbaycan-Rusiya sərhəddində - Xaçmaz gömrükxanasının “Samur” gömrük postunda görüşmüş, idxal-ixrac əməliyyatlarının gedişi, mövcud vəziyyətlə yerində tanış olaraq, problemlərin birgə həlli yollarını müzakirə etmişlər. RF Dövlət Gömrük Komitəsi sədrinin müavini Sergey Kurudskix, Rusiyanın cənub zonası üzrə gömrük idarəsinin rəisi Sergey Kundjumov, RF DGK-nin idarə rəisi Zəkəriyyə Əmirov və Dağıstan Gömrük İdarəsinin rəisi Murad Xizriyevin iştirakı ilə keçirilən görüşdə Azərbaycan Respublikası və Rusiya Federasiyası arasında ikitərəfli ticarət-iqtisadi əməkdaşlıqdan, bu sahədə böyük potensialın mövcudluğundan söhbət açılmış, qarşılıqlı surətdə faydalı iqtisadi əməkdaşlığın dərinləşdirilməsinin və ticarət dövriyyəsinin həcminin artırılmasının vacibliyinə toxunulmuşdur.
Son illər iki ölkə arasında qarşılıqlı münasibətlərin daha da dərinləşdiyini bildirən Dövlət Gömrük Komitəsinin sədri Kəmaləddin Heydərov bu əlaqələrin möhkəmlənməsində Rusiya və Azərbaycan prezidentlərinin 2001-ci ilin yanvar ayında Bakıda və bu ilin yanvarında Moskvada keçirdikləri görüşlərin böyük əhəmiyyət daşıdığını xüsusi qeyd etmiş, hökumətlərarası birgə komissiyanın Bakıda keçirilən iclasında 2010-cu ilədək olan dövrdə uzunmüddətli iqtisadi əməkdaşlıq haqqında müqavilənin təsdiqini bu əlaqələrin genişləndirilməsində böyük perspektivlər açdığını söyləmişdir. Ticarət-iqtisadi əməkdaşlığın potensial ehtiyatları olduğunu deyən K.Heydərov Rusiya və Azərbaycan arasında iqtisadiyyatın müxtəlif sahələrində kooperasiyanın dərinləşməsinin real iqtisadi fayda gətirdiyini və əhalinin sosial problemlərinin həllinə kömək etdiyini vurğulamış, hər iki ölkənin gömrük orqanları arasında yaranan əlaqələrin qarşılıqlı surətdə faydalı əməkdaşlığın dərinləşməsində müsbət rol oynadığını, qaçaqmalçılığa qarşı birgə mübarizənin gücləndirilməsinin bütövlükdə ümumi işə xeyir verdiyini demişdir.
RF Dövlət Gömrük Komitəsinin sədri Mixail Vanin Rusiya-Azərbaycan hökumətlərarası iqtisadi komissiyasının Bakı şəhərində keçirilən iclasını xatırladaraq demişdir ki, həqiqətən son illər iki ölkə arasında ticarət-iqtisadi əməkdaşlıq əlaqələri get-gedə genişlənir, iş prosesində qarşılıqlı əməkdaşlıq öz faydasını göstərir. Azərbaycan Prezidenti Heydər Əliyev ilə görüş zamanı dövlətimizin başçısının komissiyanın Bakı iclası zamanı imzalanmış sənədləri yüksək qiymətləndirdiyini minnətdarlıq hissi ilə vurfulayan M.Vanin ölkənin gömrük orqanları arasında təşəkkül tapmış münasibətlərin bundan sonra da dostluq və anlaşma şəraitində inkişaf edəcəyinə, bu münasibətlərin daha da dərinləşəcəyinə ümid etdiyini bildirmişdir.
Görüşdə Azərbaycan kənd təsərrüfatı məhsullarının Rusiyaya ixracı zamanı yaranan problemlərin aradan qaldırılması istiqamətində də fikir mübadiləsi aparılmış, Azərbaycandan Rusiyaya daxil olan kənd təsərrüfatı məhsullarının sənədləşdirmə prosedurunun tezləşdirilməsi və sadələşdirlməsi üçün müəyyən ölçülər götürülməsinin vacibliyi diqqət mərkəzində saxlanmışdır. Yeri gəlmişkən, komissiyanın Bakıda keçirilən iclasında da bu fikir xüsusilə vurğulandı ki, Azərbaycanın kənd təsərrüfatı məhsulları istehsalçıları üçün Rusiya hər zaman ən iri satış bazarı olub, lakin gömrük və sərhəd məntəqələrində tez xarab olan məhsulların Rusiyaya idxalı zamanı bir sıra problemlər yaranır. İstər komissiyanın iclasında, istərsə də Azərbaycan Prezidenti Heydər Əliyevin iqtisadi əməkdaşlıq üzrə hökumətlərarası komissiyanın Rusiya tərəfindən nümayəndə heyətinin qəbulu zamanı bu məsələ gündəlikdə saxlanmış, Azərbaycan kənd təsərrüfatı məhsullarının Rusiya bazarlarına göndərilməsi məsələləri müzakirə olunmuşdur.
Dövlət Gömrük Komitəsinin sədri Kəmaləddi Heydərov bununla bağlı bildirmişdir ki, kənd təsərrüfatı məhsullarının Rusiyaya ixracında Azərbaycan tərəfindən heç bir problem yoxdur. Bu məsələyə münasibətini bildirən Rusiya Federasiyası Dövlət Gömrük Komitəsinin sədri M.Vanin demişdir ki, hazırda xüsusilə tez xarab olan məhsullarla bağlı gömrük sənədləşməsi elə işlənib hazırlanıb ki, bu da məhsulların gömrük nəzarətində keçirilməsini xeyli tezləşdirəcək. Məsələn, yük gömrük bəyannaməsinin doldurulmasından tədricən uzaqlaşacaq, onu mədaxil orderi əvəz edəcəkdir. Bu isə gömrük nəzarət prosedurunu bir neçə dəfə tezləşdirəcək. M.Vanin onu da qeyd etmişdir ki, bu il Rusiya-Azərbaycan sərhəddindəki ən iri avtomobil keçidinin tikintisi tamamlanacaq, dördüncü rübdə sutkada 500 avtomaşının sənədləşdirilməsinə imkan verəcək bu keçid məntəqəsi işə düşəcəkdir. Bu isə ölkələrimiz arasında yük dövriyyələrinin tezləşdirilməsinə, mal dövriyyəsinin həmçinin artırılmasına böyük təkan verəcəkdir.
Azərbaycan kənd təsərrüfatı məhsullarının Rusiya ərazisinə aparılmasında, sərhədlərdən malların ləng keçməsi məsələsinin aradan qaldırılmasında lazım olan məsələlərin tezliklə həllini tapacağını deyən M.Vanin belə bir məqama da toxundu ki, sərhəddə gömrükçülərlə bərabər fəaliyyət göstərən başqa xidmətlərin də işinin təkmilləşdirilməsi davamlı prosesə çevrilməlidir.
Görüşdə bir sıra digər məsələlərə də toxunulmuşdur.
Bölmənin digər xəbərləri
