DÖVLƏT İQTİSAD UNİVERSİTETİNİN TARİX MUZEYİ TƏLƏBƏLƏRİN TƏRBİYƏSİNDƏ BÖYÜK ROL OYNAYIR
Azərbaycan Dövlət İqtisad Universitetinin tarix muzeyi 1985-ci ildən fəaliyyət göstərir. Muzeyə respublikanın qabaqcıl maarif işçisi, iqtisadiyyata dair 70-ə qədər məqalənin, "Mənalı həyat", "Ömürdən səhifələr", "Pedaqoji mülahizə və təcrübələrim", "Şuşa həsrəti" kitablarının müəllifi, bu yaxınlarda 70 yaşını qeyd etmiş iqtisad elmləri namizədi, dosent Pərviz Axundbəyli rəhbərlik edir.
Qocaman muzeyşünas və publisist AZƏRTAC-ın müxbiri ilə söhbətində əvvəlcə ali məktəbin tarixindən danışaraq demişdir ki, 1930-cu ildə əsası qoyulmuş təhsil ocağı 70 il ərzində müxtəlif adlar altında fəaliyyət göstərmişdir. Ticarət-Kooperativ İnstitutu, Azərbaycan Sosial-İqtisad İnstitutu, Azərbaycan Xalq Təsərrüfatı İnstitutu. Hətta 1987-ci ildə Leninqrad Maliyyə-İqtisad İnstitutunun Bakı filialına çevrilmişdi. Nəhayət, Azərbaycan Prezidentinin "Azərbaycan Respublikasında təhsil sisteminin təkmilləşdirilməsi haqqında" 2000-ci il 13 iyun tarixli Fərmanı ilə Azərbaycan Dövlət İqtisad İnstitutu və Bakı Əmtəəşünaslıq-Kommersiya İnstitutunun bazasında Azərbaycan Dövlət İqtisad Universiteti yaradılmışdır.
Məlumat vermişdir ki, muzeydə 15 bölmə, 6 fondlaşdırma sistemi vardır. Burada təhsil ocağının tanınmış iqtisadçı alimlərinin şəxsi arxivinlərindən nümunələr saxlanılır, şəhidlik zirvəsinə ucalmış tələbələrin xatirəsinə həsr olunmuş guşə yaradılmışdır. Hər il birinci kurs tələbələri guşədə and içir, muzeyin rəy və təkliflər kitabına öz ürək sözlərini yazırlar. Tələbələr burada iqtisadçı alimlərin ömür yolu ilə tanış olurlar. Ümumiyyətlə, onların təlim-tərbiyəsində muzey və burada toplanmış eksponatlar böyük rol oynayır.
Bölmələrdə 2000-dək eksponat vardır. Fond daim zənginləşir.
Bölmənin digər xəbərləri
