DÖVLƏT QULLUĞU MƏSƏLƏLƏRİ ÜZRƏ KOMİSSİYADA ADR-İN 90 İLLİK YUBİLEYİ QEYD OLUNMUŞDUR
AZƏRTAC xəbər verir ki, Azərbaycan Respublikasının Prezidenti yanında Dövlət Qulluğu Məsələləri üzrə Komissiyada Azərbaycan Xalq Cümhuriyyətinin 90 illik yubileyi ilə bağlı yığıncaq keçirilmişdir.
Komissiya sədrinin müavini Vəfadar Misirov xalqımızın tarixində və taleyində misilsiz yer tutan Azərbaycan Xalq Cümhuriyyətinin yaradılması, fəaliyyəti, nailiyyətləri və süqutu barədə geniş danışmışdır. Natiq 28 may 1918-ci ildə Şərqdə ilk demokratik və dünyəvi dövlətin - Azərbaycan Xalq Cümhuriyyətinin yaranmasını xalqımızın azadlıq, müstəqillik və demokratiya uğrunda apardığı milli azadlıq mübarizəsinin yekunu kimi qiymətləndirmişdir. “Azərbaycan Xalq Cümhuriyyətinin 90 illik yubileyi haqqında” Azərbaycan Respublikasının Prezidenti İlham Əliyevin 2008-ci il fevralın 15-də Sərəncam imzaladığını bildirən V.Misirov burada dövlət başçısının həmin yubileyə verdiyi əhəmiyyəti xüsusi vurğulamışdır.
Dövlət qulluğuna kadrların seçilməsi şöbəsi müdirinin müavini Rauf Məcidbəyli və Komissiyanın mətbuat katibi Asəf Əliyev çıxış edərək, Azərbaycan Xalq Cümhuriyyətinin keçdiyi ağır və şərəfli yoldan danışmış, milliyyətindən, siyasi və dini mənsubiyyətindən, cinsindən asılı olmayaraq bütün vətəndaşlara bərabər hüquqların verilməsinin, dövlət sərhədlərinin müəyyən olunmasının, dövlətçilik atributlarının qəbul edilməsinin, ana dilinin dövlət dili elan olunmasının, hakimiyyət strukturunun və onun fəaliyyət mexanizminin formalaşmasının Azərbaycanın gələcək müstəqilliyi üçün möhkəm zəmin yaratdığını qeyd etmişlər.
Bölmənin digər xəbərləri
