DÜNYA ÜZRƏ QAÇQINLARIN SAYI 2007-Cİ İLDƏ 42 MİLYONA ÇATMIŞDIR
AZƏRTAC-ın xüsusi müxbiri xəbər verir ki, 2007-ci ildə müharibə, insan haqlarının pozulması, təbii fəlakətlər və təqiblər nəticəsində qaçqın həyatı sürən insanların sayı dünya üzrə 42 milyona çatmışdır (2006-cı ildə 34,3 milyon nəfər). Bu barədə statistik məlumatlar BMT-nin qaçqınlar üzrə ali komissarı Antonio Quterresin Cenevrədə təqdim etdiyi “Qlobal trendlər” illik hesabatında öz əksini tapmışdır.
150 ölkənin məlumatları əsasında tərtib edilmiş illik hesabatda vətənini tərk edərək xarici ölkələrdə sığınacaq axtarmağa məcbur olmuş insanların sayı 11,4 milyon (2006-cı ildə 9,9 milyon), öz vətənlərində məcburi köçkün həyatı sürən insanların sayı isə 26 milyon nəfər olduğu (2006-cı ildə 24,4 milyon) göstərilmişdir.
Hesabatda dünyada qaçqınların sayının getdikcə artmasının əsas səbəbi kimi İraqdakı mövcud vəziyyət qeyd edilir. 2007-ci ilin sonunda buradakı ölkədaxili qaçqınların sayı 2,4 milyon nəfərə (həmin ilin əvvəlində isə 1,8 milyon nəfər) bərabər olmuşdur. Vətəndaşları qaçqın kimi başqa ölkələrə pənah aparan ölkələr arasında ən böyük kontingent Əfqanıstan (3 milyon nəfər) və İraqdır (2 milyon nəfərdən artıq).
A.Quterres 2001-2005-ci illərdə dünyada qaçqınların sayının nisbətən azaldığının müşahidə edildiyini desə də, beynəlxalq bazarlarda qiymətlərin artması, yeni münaqişə ocaqlarının yaranması, təbii resursların sürətlə tükənməsi və digər qlobal problemlər nəticəsində gələcəkdə qaçqınların sayının daha da artması təhlükəsinin mövcudluğunu bildirmişdir.
Bölmənin digər xəbərləri
