ELM VƏ TƏHSİL
Ədəbiyyat İnstitutunda Hüseyn Cavidin 140 illik yubileyi elmi konfransla qeyd olunub
Bakı, 17 oktyabr, AZƏRTAC
AMEA-nın Nizami Gəncəvi adına Ədəbiyyat İnstitutunda görkəmli Azərbaycan şairi və dramaturqu Hüseyn Cavidin anadan olmasının 140 illik yubileyinə həsr edilmiş elmi konfrans keçirilib.
İnstitutdan AZƏRTAC-a bildirilib ki, tədbirdə böyük şəxsiyyətdən bəhs edən slayd nümayiş olunub. Tədbiri giriş sözü ilə açan AMEA-nın vitse-prezidenti, Ədəbiyyat İnstitutunun baş direktoru akademik İsa Həbibbəyli bildirib ki, Hüseyn Cavid Azərbaycan ədəbiyyatının görkəmli nümayəndəsi, romantik korifeyidir. Azərbaycan Prezidenti onun 140 illik yubileyinin qeyd olunması ilə bağlı Sərəncam imzalayıb. Hüseyn Cavid romantizm ədəbi cərəyanın böyük nümayəndəsidir. Azərbaycan ədəbiyyatında romantizm ədəbi cərəyanı “Füyuzat” jurnalının bazasında yaranıb. Bu ədəbi cərəyanın əsasları Əlibəy Hüseynzadə tərəfindən qoyulub, onun ədəbi cərəyan kimi formalaşmasında Hüseyn Cavidin xidməti danılmazdır. Hüseyn Cavidin romantizm haqqında ayrıca məqaləsi olmasa da, əsərlərində romantizmin ideyası və prinsiplərinə aid konseptual məsələlər var.
Sonra XX əsr (sovet dövrü) Azərbaycan ədəbiyyatı şöbəsinin müdiri filologiya elmləri doktoru, professor Şirindil Alışanlı “Hüseyn Cavid irsi ədəbi-nəzəri fikir tarixində” mövzusunda məruzə edib. Qeyd edib ki, Hüseyn Cavidin irsi XX əsrin 20-ci illərindən tədqiq olunmağa başlayıb, reaksiyalar olub. Mətbuatda geniş müzakirələrə səbəb olub. Ən çox mübahisə meydanı əsərlərinin tamaşası haqqında idi. Cəlal Qasımovun “Ədəbi məhkəmələr” kitabı bu mübahisələrin yekunu kimi çap olundu. Mustafa Quliyev onun əsərlərini Puşkin poeziyası ilə müqayisə edirdi.
Konfransda filologiya elmləri doktoru Lütviyyə Əsgərzadə “Hüseyn Cavidin həyatı və yaradıcılığı”, filologiya elmləri doktoru, professor Tahirə Məmməd “Hüseyn Cavid yaradıcılığı və neosufizm” mövzusunda məruzələrdə ədibin ədəbi irsindən söz açıblar.
Türkiyədən Burdur Mehmet Akif Ersoy Universiteti Türk dili və ədəbiyyatı kafedrasının əməkdaşı Canan Olpak Koç “Hüseyn Cavidin türk ədəbiyyatında yeri” və Özbəkistandan Çirçiq Dövlət Pedaqoji İnstitutu Özbək ədəbiyyatı kafedrasının dosenti, filologiya elmləri doktoru Ədibə Dövlətova “Hüseyn Cavid irsində millətsevərlik, azadlıq və kamillik qayələrinin müştərək ifadəsi” mövzularında məruzə ediblər.
Filologiya üzrə fəlsəfə doktoru Rasim Nəbioğlu “Hüseyn Cavidin estetik idealı”, filologiya elmləri doktoru, professor İslam Qəribli “Sənətkarın yaradıcılığında Birinci Dünya müharibəsi mövzusu”, filologiya elmləri doktoru Pərvanə İsayeva “Bədii mətnin mifopotik aspekti (Hüseyn Cavidin “İblis” dramı əsasında)” və filologiya üzrə fəlsəfə doktoru Aysel Qurbanova “Hüseyn Cavid dramaturgiyasında məkanın bədii funksiyası” mövzularında məruzə ilə çıxış ediblər.