Bakı, 16 avqust, AZƏRTAC

Ermənistanla Azərbaycan arasında danışıqlar prosesi yekunlaşmağa, sülh müqaviləsi imzalanmağa çox yaxın ikən, qarşı tərəfdə vəziyyət kəskin şəkildə dəyişib. Ermənistan barışmağa deyil, yenidən savaşmağa, İkinci Qarabağ müharibəsinin nəticələrinə görə Azərbaycandan qisas almağa qərar vermiş kimi görünür. Əvvəllər ayrı-ayrı partiyaların, millətçi qrupların bəyanatlarında görünən qisasçılıq ritorikası böyüyərək son günlərdə Ermənistanın dövlət siyasətinə çevrilib.

Bu sözləri Mətbuat Şurası İdarə Heyətinin üzvü, media eksperti Müşfiq Ələsgərli AZƏRTAC-a açıqlamasında söyləyib.

Onun sözlərinə görə, ermənilər qisasçılıq hisslərinə əsaslanan istəklərini reallaşdırmaq üçün əməli addımlar atırlar. Belə ki, Qarabağda məskunlaşmış separatçı qüvvələrin silah-sursat təminatını möhkəmləndirmək üçün cəhdlər intensivləşib. Həmçinin Ermənistan silahlı qüvvələrinin bölmələri Azərbaycan sərhədi boyunca toplanılır. Buna paralel olaraq, erməni diasporunun, lobbi qruplarının və diplomatik korpuslarının da hərəkətə keçdiyi müşahidə edilir. Los-Ancelesdə erməni millətçiləri Azərbaycan konsulluğunun binasını əhatəyə alaraq iftira dolu şüarlar səsləndiriblər. Ermənistan hökuməti isə BMT Təhlükəsizlik Şurasına müraciət edərək Qarabağdakı erməni icmasının durumunu müzakirəyə çıxarır. Sinxron şəkildə baş verən bu və digər hadisələr deməyə əsas yaradır ki, proseslər bir mərkəzdən idarə edilir, insidentlər Ermənistan dövlətinin dəstəyi ilə reallaşdırılır. Problem ondadır ki, Ermənistanın sülh danışıqlarından yayınmasına, revanşizmə meyillənməsinə təsir göstərən qlobal faktorlar mövcuddur. Beynəlxalq təşkilatlar Ermənistanın hərəkətlərinə göz yummaqla, davranışlarına haqq qazandırmaqla, yaxud bəzi dövlətlər Ermənistanı silahlandırmaqla, maddi vəsaitlə təmin etməklə onu Azərbaycana qarşı yenidən savaşmağa ruhlandırırlar. Təəssüf ki, bu avantürist prosesdə Avropa İttifaqının Ermənistandakı missiyasının da rolu görünür. Dünən Avropa İttifaqının Ermənistandakı missiyası bəyanat yayaraq, bu ölkənin Azərbaycan sərhədinə hərbi texnika yığması barədə faktları təkzib edib. Baxmayaraq ki, Azərbaycan tərəfi həm sərhəddə, həm də Rusiya sülhməramlılarının müvəqqəti nəzarətindəki ərazilərdə Ermənistanın qoşun konsentrasiyasının artırıldığına dair əyani faktlar- videomateriallar təqdim edib. Normalda Aİ missiyası bu faktlara istinad edib hərbi texnikanın, silah-sursatın və ağır artilleriya vasitələrinin toplandığı nöqtələri yoxlamalı idi. Yekunda Ermənistanın davranışlarını pisləməli, bu hərəkətlərin sülh əleyhinə yönəldiyini deməli idi. Amma əksinə davrandı: təqdim edilmiş videofaktları görməzdən gəldi, dolayısı ilə Ermənistanın avantürist davranışlarına haqq qazandırmış oldu.

“Belə davranış Avropa İttifaqının Ermənistandakı missiyasının səlahiyyətlərini aşır. Həmçinin onların tərəfsizliyini, sülh üçün çalışdıqlarını şübhə altına alır. Azərbaycanla Ermənistan arasında münaqişənin alovlanmasını stimullaşdıran mərkəzlər arasında yer tutduqlarına dair şübhələr yaradır. Paradoksal haldır ki, Avropa İttifaqının özü Ermənistanla Azərbaycan arasında sülh danışıqlarının keçirilməsi, barışığın əldə edilməsi üçün xüsusi platforma yaradıb. Bu kontekstdə yanaşsaq, Ermənistandakı missiyanın son açıqlaması ümumilikdə Avropa İttifaqının sülh təşəbbüslərinə xələl gətirir, onun sülhyaradıcı imicini zədələyir”, - deyə ekspert vurğulayıb.

O bildirib ki, ilkin razılaşmaya görə, Aİ-nin Ermənistandakı missiyası 2025-ci ilin fevral ayına qədər fəaliyyət göstərəcək. İndi onun davranışlarında redaktələr edilməsə, qarşıdakı müddət ərzində ciddi fəsadlara yol aça bilər. Bu kontekstdə gözləniləndir ki, Azərbaycan tərəfi Ermənistandakı missiyanın hərəkətlərinin qiymətləndirilməsi üçün təkid edəcək. Ümid edirik ki, Avropa İttifaqı faktları nəzərə alaraq, Ermənistandakı missiyasının hərəkətlərini təhlil edəcək, onun mövcudluğunu şərtləndirən amilləri yenidən qiymətləndirəcək.