ƏLİYEVŞÜNASLIĞA - AZƏRBAYCAN DÖVLƏTÇİLİYİNƏ DƏYƏRLİ TÖHFƏ
BAKI, “TƏHSİL” NƏŞRİYYATI. 2003, 504 s.
Müstəqil, yeni Azərbaycan dövlətçiliyini, millətimizin azadlığını və suverenliyini əbədi yaşatmaq üçün çağdaş dünyanın böyük siyasət və dövlət adamı kimi tanınan Heydər Əliyevin zəngin irsi, dövlət idarəçiliyi sahəsindəki çoxcəhətli, fenomenal təcrübə məktəbi misilsiz mənəvi sərvətlər xəzinəsi, milli dəyərlər örnəyidir. Bu nadir şəxsiyyətin zəngin siyasi və dövlətçilik təcrübəsinin elmi əsaslarla dərindən öyrənilməsi, bu böyük, dahi dövlət adamının öz həyatının bütün dönəmlərində xalqına, Vətəninə necə də sədaqətlə, vətəndaş, övlad qeyrəti ilə xidmət etməsinin araşdırılması və gələcək nəsillərə təqdim olunması mahiyyətcə Azərbaycanın çağdaş milli tarixinin tədqiqi deməkdir. Doğrudur, son illərdə bu tarixi şəxsiyyətin siyasi və dövlətçilik fəaliyyətinin müxtəlif aspektlərinə kitablar həsr olunsa da, Heydər Əliyevin müstəqil Azərbaycan dövlətinin yaranması və möhkəmləndirilməsində rolu, onun Azərbaycan dövlətçiliyi və Azərbaycan xalqı qarşısındakı xidmətləri istiqamətində genişmiqyaslı, elmi əsaslara, ilkin qaynaqlara söykənən ümumiləşdirici araşdırmalara böyük ehtiyac vardır.
Azərbaycan tarixşünaslığındakı mövcud boşluğu doldurmaq baxımından tarix elmləri namizədi, dosent İradə Hüseynovanın bu günlərdə nəfis tərtibatda, yüksək poliqrafik icrada işıq üzü görmüş irihəcmli, monumental tədqiqat əsəri olan “Müstəqilliyimizin təminatçısı” adlı monoqrafiyası Əliyevşünaslığa və bütövlükdə Azərbaycan dövlətçiliyinə çox dəyərli töhfə sayılmalıdır. İradə Hüseynova ölkəmizdə sayılıb-seçilən tarixçi alim olmaqla yanaşı, Heydər Əliyevin siyasi və dövlətçilik fəaliyyətini araşdıran, müstəqil Azərbaycan dövlətinin yaranması, inkişafı və möhkəmləndirilməsində Heydər Əliyevin roluna həsr olunmuş ilk doktorluq dissertasiyasının da müəllifi kimi tanınır. Onun bu istiqamətdə “Dövlətçilik naminə” adlı (Bakı, 2001) monoqrafiyası və magistrlər üçün üç dildə “Heydər Əliyev və Qafqazda sülh prosesi” (Bakı, 2003) adlı tədris proqramı, 50-yə yaxın elmi-nəzəri məqaləsi nəşr edilmiş, ölkəmizdə və xaricdə keçirilən nüfuzlu elmi beynəlxalq forumlarda, konfranslarda, simpoziumlarda böyük rəğbətlə qarşılanan çoxsaylı məruzələri dinlənilmişdir.
Müəllifin elmi ictimaiyyətə təqdim olunan “Müstəqilliyimizin təminatçısı” adlı fundamental monoqrafiyası istər məzmunu və mündərəcəsi, istərsə də araşdırılan problemlərin elmi-nəzəri dərinliyi, sanbalı ilə diqqəti cəlb edir, tədqiqat tarixşünaslığın ən son nailiyyətləri əsasında təqdim olunur.
Kitabda xalqımızın böyük oğlu, müstəqilliyimizin təminatçısı Prezident Heydər Əliyevin Azərbaycan dövlətçiliyinin qorunub saxlanılması, möhkəmləndirilməsi, dönməzliyi və əbədiliyinin təmin olunması uğrunda yorulmaz mübarizəsi, ölkəmizdə hüquqi, demokratik və dünyəvi dövlət qurulması istiqamətində həyata keçirdiyi məqsədyönlü islahatlar, Qafqazda və dünyada sülhün, əmin-amanlığın bərqərar edilməsi, iqtisadi inteqrasiyanın sürətlənməsinə yönələn xarici siyasət strategiyası, ölkədə əhalinin sosial-mədəni yüksəlişinə yönəlmiş daxili siyasətinin əsas aspektləri zəngin mənbələr, arxiv materialları əsasında, beynəlxalq təcrübə nəzərə alınmaqla sistemli şəkildə tətqiqata cəlb olunmuşdur.
Üç böyük bölmədən ibarət olan bu dəyərli araşdırmaya tarix elmləri doktoru Əli Həsənov sanballı “Ön söz” yazmışdır. “Heydər Əliyev - müstəqilliyimizin keşiyində”, “Heydər Əliyev ideyaları qalib gəlir” və digər bölmələrdə bu dahi şəxsiyyətin siyasi və dövlətçilik fəaliyyətinin müxtəlif istiqamətləri dərindən-dərinə, incədən-incəyə, zərgər dəqiqliyi, elmi şərhlərinin tutarlılığı ilə geniş ictimaiyyətə təqdim olunmuşdur.
Tanınmış tarixçi alim, YAP Siyasi Şurasının üzvü İradə Hüseynovanın böyük zəhməti, səmərəli axtarışları nəticəsində yaranmış “Müstəqilliyimizin təminatçısı” adlı sanballı monoqrafiyası sözün həqiqi və geniş mənasında Heydər Əliyev şəxsiyyətinə, onun titanik siyasi-dövlətçilik fəaliyyətinə layiq əsər olmaqla Əliyevşünaslığa dəyərli ərməğan, tarixşünaslıq elmimizin böyük uğuru kimi qiymətləndirilməlidir.
İnanırıq ki, bu əsər elmi ictimaiyyətin böyük marağına səbəb olacaq, Əliyevşünaslıqla, bütövlükdə çağdaş Azərbaycan dövlətçiliyi ilə məşğul olan mütəxəssislərin stolüstü kitabına çevriləcəkdir.
Bölmənin digər xəbərləri
