CƏMİYYƏT
Əmək və Əhalinin Sosial Müdafiəsi Nazirliyinin rəsmi internet səhifəsində onlayn əlaqə xidməti istifadəyə verilib
![Əmək və Əhalinin Sosial Müdafiəsi Nazirliyinin rəsmi internet səhifəsində onlayn əlaqə xidməti istifadəyə verilib](/files/2020/1/1200x630/1581408427183046476_1200x630.jpg)
Bakı, 11 fevral, AZƏRTAC
Fevralın 11-dən Əmək və Əhalinin Sosial Müdafiəsi Nazirliyinin rəsmi internet səhifəsində (sosial.gov.az) onlayn əlaqə xidməti istifadəyə verilib. Məqsəd vətəndaşlarla ünsiyyət və onların nazirliyə müraciət imkanlarının daha da genişləndirilməsi, vətəndaş müraciətlərinin, sorğularının real vaxt rejimində də operativ cavablandırılması mexanizminin tətbiqidir.
Nazirliyin İctimaiyyətlə əlaqələr və kommunikasiya xidmətindən AZƏRTAC-a verilən məlumata görə, həmin xidmət vasitəsilə vətəndaşlar nazirliyin fəaliyyət istiqamətlərinə aid olan bütün məsələlər üzrə (sosial müdafiə, əlilliyin müəyyən edilməsi və reabilitasiya, məşğulluq, əmək qanunvericiliyi, elektron xidmətlər və s.) suallarını ünvanlaya bilərlər.
Nazirliyin rəsmi internet səhifəsinə daxil olan şəxs səhifədə onlayn əlaqə (canlı çat) xidməti işarəsinə toxunduqdan sonra açılan lövhədə öz sualını (və ya suallarını) qeyd edir. Suallar 142-Çağrı mərkəzinin operatorları tərəfindən avtomatik qeydə alınır və cavablandırılır.
Cavablandırma xidmətinin sonunda vətəndaş onlayn əlaqə vasitəsilə göstərilən həmin xidmətin keyfiyyətinin qiymətləndirilməsi üçün təklif olunan sorğuda da iştirak edə bilər.
Onlayn əlaqə xidməti həftənin I-V günləri saat 9-dan saat 18-dək, şənbə günləri isə saat 10-dan saat 13-dək canlı rejimdə fəaliyyət göstərəcək.