MƏDƏNİYYƏT
“Əmir Teymur zirvəyə doğru” və “Əmir Teymur dünyanın hakimi” kitabları təqdim olunmuşdur
Bakı, 19 aprel (AZƏRTAC). Aprelin 19-da Azərbaycanda Atatürk Mərkəzində yazıçı Yunis Oğuzun “Apostrof” nəşriyyatında çapdan çıxmış “Əmir Teymur zirvəyə doğru” və “Əmir Teymur dünyanın hakimi” kitablarının təqdimat mərasimi keçirilmişdir.
AZƏRTAC xəbər verir ki, mərkəzin direktoru, Azərbaycan Milli Elmlər Akademiyasının (AMEA) müxbir üzvü, Əməkdar Elm Xadimi, Milli Məclisin mədəniyyət komitəsinin sədri Nizami Cəfərov ulu öndər Heydər Əliyevin tövsiyəsi ilə yaradılmış qurumda türk xalqları ilə əlaqələrin genişlənməsinə böyük diqqət yetirildiyini bildirmişdir. Natiq Y. Oğuzun bu sahədəki fəaliyyətindən danışaraq vurğulamışdır ki, indiyədək mərkəzdə yazıçının bir neçə kitabının təqdimatı keçirilmişdir. Onun əvvəlki əsərlərində olduğu kimi, “Əmir Teymur zirvələrə doğru” və “Əmir Teymur dünyanın hakimi” kitablarında da türk övladının qəhrəmanlıq salnaməsi əksini tapmışdır.
Bildirilmişdir ki, son illər özünü türkoloq alim və tarixi romanlar müəllifi kimi tanıtmış Y.Oğuzun bir-birinin ardınca Türkiyədə “Atilla” və “Qədim türklər və rasionallıq nəzəriyyəsi L.N.Qumilyovun tədqiqatlarında”, Rusiyanın paytaxtı Moskvada rus dilində “Əmir Teymur zirvəyə doğru” romanı (“Tamerlan put k verşine”), Bakıda bu gün təqdimatı keçirilən “Əmir Teymur zirvəyə doğru”, “Əmir Teymur dünyanın hakimi” kitabları çapdan çıxmışdır. Bu kitablarda türk xalqlarının tarixi araşdırılır, böyük şəxsiyyətlər və onların haqqında söylənilmiş faktlar bədii obrazlar vasitəsilə canlandırılır.
Tanınmış mədəniyyət xadimi Ramiz Abutalıbov müəllifi tarixi varisliyi olan yazıçı kimi dəyərləndirmiş, onun əsərlərini türkçülük, dilimizə və tariximizə sədaqət rəmzi adlandırmışdır.
Çıxış edənlər Y.Oğuzun elmi və bədii yaradıcılığının üzvi şəkildə bir-birini tamamladığını bildirmişlər.
Hər iki kitabın redaktoru Fatimə Abbasquluyeva, “Ön söz”ün müəllifi AMEA-nın müxbir üzvü, Əməkdar Elm Xadimi, Milli Məclisin mədəniyyət komitəsinin sədri Nizami Cəfərovdur.
Sonda Y. Oğuz tədbirin təşkilatçılarına və iştirakçılarına minnətdarlığını bildirmiş, əsərlərinin Təhsil Nazirliyinin müvafiq göstərişi ilə orta məktəb dərsliklərində istifadə olunacağını vurğulamışdır.