“Ərəb mətbuat dili” dərs vəsaiti nəşr olunub
Bakı, 15 avqust, AZƏRTAC
Azərbaycan İlahiyyat İnstitutunun dəstəyi ilə “Ərəb mətbuat dili” dərs vəsaiti nəşr olunub. Dərs vəsaitinin müəllifləri – dosent Məmmədəli Babaşlı, Abdin Uveys Yunis, Qafar Ocaqlı kitaba ərəb dilində seçilmiş rəsmi işgüzar yazışma mətnləri, ərəb ədəbi dili normalarının tələblərinə əsasən tərtib olunmuş ictimai-siyasi, elmi-texniki, mədəni və digər aktual mövzularda orijinal nümunələr daxil ediblər.
İnstitutdan AZƏRTAC-a bildirilib ki, müxtəlif sahələrə aid terminlərin yaxşı mənimsənilməsi və istifadə edilməsini asanlaşdırmaq məqsədilə mətnlər hərəkələnib, çətin başa düşülən söz və ifadələr tərcümə olunub.
Hər mövzunun sonunda mətnin məzmununun səviyyəsini müəyyənləşdirmək, tərcümə, şifahi və yazılı nitq vərdişləri aşılamaq üçün çalışmalar verilib.
Oxucuları müasir ərəb jurnalistikasının yazı üslubu ilə yaxından tanış etmək məqsədilə mətnlər müxtəlif ərəb ölkələrinin mətbuat orqanlarından seçilib. Dərs vəsaitinə daxil edilən xəbərlər ərəb dünyası haqqında dolğun təsəvvürün formalaşmasına və milli ərəbşünaslar tərəfindən Azərbaycan həqiqətlərinin ərəbdilli mətbuatda işıqlandırılmasına zəmin hazırlayacaq.
Bakalavriat və magistratura tələbələri üçün nəzərdə tutulan dərs vəsaitindən İlahiyyat və Şərqşünaslıq fakültələrinin tələbələri, dil kurslarının müdavimləri və ərəb dilini müstəqil şəkildə öyrənənlər faydalana biləcəklər.
Bölmənin digər xəbərləri
