ERMƏNİSTANDA TOTALİTAR REJİM MÖVCUDDUR
Bu fikri Avropa Şurası Parlament Assambleyasının yaz sessiyasında Ermənistanda keçirilmiş prezident seçkilərinin yekunları ilə bağlı müzakirələr zamanı AŞPA-da Azərbaycan parlament nümayəndə heyətinin rəhbəri Səməd Seyidov söyləmişdir.
AZƏRTAC-ın xüsusi müxbiri xəbər verir ki, aprelin 14-də günün ikinci yarısında öz işini davam etdirmiş sessiyada bir sıra məsələlərlə yanaşı, Ermənistandakı prezident seçkilərinin nəticələri ilə əlaqədar böyük britaniyalı deputat Con Preskottun hazırladığı məruzə dinlənilmişdir. Məruzəçi Ermənistanda keçirilmiş prezident seçkiləri zamanı bir çox nöqsanlara yol verildiyini xatırlatmış, beynəlxalq müşahidəçilər tərəfindən səslərin sayılmasında ciddi xətaların qeyd edildiyini, bəzi seçki məntəqələrində seçicilərin adlarının səsvermə siyahısına daxil edilmədiyini bildirmiş və bunlarla yanaşı məsələni bir qədər yumşaltmağa səy göstərmişdir. Bu isə məruzə ilə bağlı müzakirələrdə çıxış edən deputatların haqlı narazılığına səbəb olmuşdur.
Səməd Seyidov məruzənin qeyri-obyektiv hazırlandığını, ikili standartlara yol verildiyini və reallığı tam əks etdirmədiyini bildirmiş, Ermənistanda prezident seçkilərində baş vermiş hadisələrin demokratik inkişafa tamamilə zidd olduğunu qeyd etmiş, bəzi quvvələrin Ermənistanda dinc nümayişçilərə qarşı törədilmiş cinayətləri ört-basdır etməyə cəhd göstərmələrini qətiyyətlə pisləmişdir.
Azərbaycan nümayəndə heyətinin rəhbəri bildirmişdir ki, Avropa Şurasında həmişə yüksək dəyərlərdən söhbət açarkən Ermənistanda onlarla nümayişçinin vəhşiliklə qətlə yetirilməsi, yüzlərlə insanın, o cümlədən toxunulmazlıq statusuna malik deputatların həbsə alınması və Ermənistanın demokratik inkişafdan çox uzaq olması faktı yaddan çıxarılmamalı, avropalı deputatlar bu məsələyə göz yummamalıdırlar. S.Seyidov məruzənin bu şəkildə qəbul edilməsinin qəti əleyhinə olduğunu vurğulamışdır.
Numayəndə heyətimizin rəhbəri Ermənistanda baş vermiş hadisələri dünya ictimaiyyətindən gizlətməyin və onlar barədə müsbət və yaxud bitərəf mövqe formalaşdırmağın yolverilməz olduğunu göstərmiş, buna kəskin şəkildə etiraz etmiş, hadisə ilə bağlı faktları avropalı deputatların nəzərinə çatdırmışdır. O bildirmişdir ki, Ermənistanda baş vermiş hadisələr zamanı 9 nəfər meydanda həlak olmuş, 20 nümayişçi isə aldıqları yaradan xəstəxanalarda dünyasını dəyişmişdir. S.Seyidov nümayişçilərə qarşı bütün silah növlərindən istifadə edildiyini, hətta onların üzərinə tankların yeridildiyini və Avropa Şurasının tarixində belə bir vəhşi hadisənin olmadığını qeyd etmişdir. Belə bir hadisənin sovetlər birliyi dövründə baş verdiyini xatırladan deputatımız, Sovet ordusunun Vilnüsdə, Tbilisidə və nəhayət Bakıda qanlı faciələr törətdiyini və bu ordunun totalitar rejimin ordusu olduğunu göstərmişdir. Eyni hadisə Ermənistanda törədilirsə, deməli bu ölkədə də totalitar rejim mövcuddur.
Sonda S.Seyidov bu məsələnin araşdırılmasına ciddi ehtiyac olduğunu bildirmiş, bunun üçün xüsusi komissiyanın yaradılmasını və hadisələrə obyektiv qiymət verilməsini təklif etmişdir.
Ermənistanın ölkəmizə qarşı apardığı işğalçılıq siyasətinə toxunan deputat Qənirə Paşayeva torpaqlarımızın 20 faizinin 15 ildən artlq zəbt olunduğunu, BMT və AŞ kimi mötəbər və nüfuzlu təşkilatların qətnamələrinə məhəl qoyulmadığını xatırlatmış, Ermənistanın yeni seçilmiş prezidenti Serj Sarkisyanın ATƏT-in Minsk qrupu həmsədrlərinin vasitəçiliyi ilə davam edən danışıqlar prosesinə zərbə vuran çoxlu sayda bəyanatlar verdiyini diqqətə çatdırmışdır.
Ermənistanda keçirilmiş prezident seçkilərindən danışan Milli Məclisin deputatı seçkilərin işğal altındakı Azərbaycan ərazilərindən Dağlıq Qarabağda, Laçın və Kəlbəcər rayonlarında keçirilməklə rəsmi Yerevanın beynəlxalq hüquq normalarını növbəti dəfə pozmaqla yanaşı, münaqişənin dinc yolla nizamlanmasına dair Avropa Şurası qarşısında götürdüyü öhdəliyə bir daha əməl etmədiyini bildirmişdir.
Q.Paşayeva Cənubi Qafqaz bölgəsində vəziyyətin getdikcə gərginləşməsinin bütün Avropa üçün ciddi təhlükə olduğunu qeyd etmiş və Avropa Şurasını Ermənistan-Azərbaycan, Dağlıq Qarabağ münaqişəsini dinc yolla həlli istiqamətində öz səylərini artırmağa çağırmışdır.
Azərbaycanlı həmkarları ilə bərabər bir çox avropalı deputat tərəfindən Ermənistanda baş vermiş hadisələrlə əlaqədar obyektiv və xüsusi araşdırmalar aparmaq barədə çağırışlar səslənmişdir.
Bölmənin digər xəbərləri
