İQTİSADİYYAT
“FAZA-1” LAYİHƏSİ ÇƏRÇİVƏSİNDƏ
Azərbaycan Beynəlxalq Əməliyyat Şirkətinin (ABƏŞ) mətbuat xidmətindən AZƏRTAC-a bildirmişlər ki, “Azəri” yatağında istismar quyularının qazılması prosesini sürətləndirmək məqsədi ilə 28 qabaqlayıcı quyu qazılacaqdır. Həmin quyulardan 12-si “Azəri” yatağının mərkəzi hissəsinin işlənilməsini nəzərdə tutan “Faza-1” layihəsi çərçivəsində qazılacaqdır.
Hazırda yarımdalma üzən qazma qurğusunun köməyi ilə beşinci quyuda qazma işləri gedir.
Bu layihə üzrə işlər başa çatdıqdan sonra ABƏŞ “Azəri” yatağının qərb və şərq hissələrinin işlənilməsini nəzərdə tutan “Faza-2” layihəsi çərçivəsində qabaqlayıcı quyuların qazılmasına başlamaq fikrindədir.
“Faza-1” layihəsinə ötən il avqustun 30-da sanksiya verilmişdir və bu layihə çərçivəsində ilk neft 2005-ci ilin əvvəllərində çıxarılacaqdır. “Faza-2” layihəsinə isə bu il sentyabrın 18-də sanksiya verilmişdir və həmin layihəyə uyğun olaraq, ilk nefti 2006-cı ilin ikinci rübündə hasil etmək nəzərdə tutulur. ABƏŞ, bu layihə üzrə hasilatın maksimum səviyyəsi ildə 20 milyon ton olmaqla, 210 milyon ton “qara qızıl” çıxarmaq niyyətindədir.