Fərid Şahbazlı: Prezident İlham Əliyevin nitqi Azərbaycan gəncliyinin fəaliyyəti üçün yol xəritəsidir
Bakı, 2 fevral, AZƏRTAC
Prezident İlham Əliyev Azərbaycan Gəncləri Gününə həsr olunmuş respublika toplantısındakı nitqində ölkə gəncliyinə inandığını və güvəndiyini bəyan etdi. Dövlətimizin başçısının bu yüksək etimadı gəncliyimizi qürurlandırmaqla yanaşı, məsuliyyətimizi də artırır. Gənclər Azərbaycan dövlətinin onlara göstərdiyi etimadı bundan sonra da doğrultmağa çalışacaqlar.
Bu sözləri “İslahatçı Gənclər” İctimai Birliyinin (İGİB) sədri, respublika toplantısının iştirakçısı Fərid Şahbazlı AZƏRTAC-a açıqlamasında deyib.
O bildirib ki, Prezident İlham Əliyevin nitqi Azərbaycan gənclərinin gələcək fəaliyyətində yol xəritəsi rolunu oynamaqla yanaşı, gəncliyin qarşısında duran vəzifələri dəqiq müəyyən etdi: “Azərbaycanda həyata keçirilən gənclər siyasətinin mahiyyətində gəncliyi dövlətçiliyə, milli-mənəvi dəyərlərə sadiq, eyni zamanda, dünyadakı rəqabət şərtlərinə davam gətirəcək səviyyədə intellektual və mobil qüvvə kimi görmək istəyi dayanır. Bu siyasətin məntiqi nəticəsidir ki, bu gün gənclər hakimiyyətin müxtəlif qollarında təmsil olunmaqla dövlət idarəçiliyində yaxından iştirak edirlər”.
2 fevral - Azərbaycan Gəncləri Gününün təsis edilməsinin ümummilli lider Heydər Əliyevin ölkə gəncliyinə ən böyük hədiyyəsi olduğunu vurğulayan F.Şahbazlı deyib: “Ulu Öndərin xalqın təkidli tələbi ilə hakimiyyətə qayıdışından sonra Azərbaycanda Gənclər və İdman Nazirliyi yaradıldı, gənclərin respublika forumlarının keçirilməsinə başlanıldı, bu sahədə qanunvericilik bazası təkmilləşdirildi. Gənclərin sosial, iqtisadi və s. problemlərinin həllinə yönələn, onların öz qabiliyyətlərini inkişaf etdirmələrinə kömək edən fərman və sərəncamlar, dövlət proqramları bu qəbildəndir”.
Azərbaycan dövlətinin ölkənin gələcəyini etibar edəcəyi gənc nəslin formalaşmasına xüsusi önəm verdiyini deyən İGİB sədri bildirib: “Prezident İlham Əliyevin fərman və sərəncamları, uğurla həyata keçirilən dövlət proqramları gənclərin təhsili, ailə, məişət, məşğulluq məsələlərinin həllində mühüm rol oynayır. Dövlətimizin başçısının Fərmanı ilə Gənclər Fondunun yaradılması, paytaxtda və regionlarda Gənclər evlərinin və mərkəzlərinin istifadəyə verilməsi gəncliyin uğurlu gələcəyinə hesablanıb. Təsadüfi deyil ki, Prezident İlham Əliyev gənclərə olan münasibətini belə ifadə edib: “Mənim gənclərə xüsusi münasibətim var, mənim ürəyim sizinlədir. Siz bütün işlərdə mənə arxalana bilərsiniz. Mən də sizə arxalanıram”.
Bölmənin digər xəbərləri
