CƏMİYYƏT
FHN-in İdman-sağlamlıq klubunda “Narkotik və dopinqə yox” adı altında seminar keçirilib
![](/files/galleryphoto/2022/3/1200x630/16655623295196311379_1200x630.png)
![](/files/galleryphoto/2022/3/1200x630/16655623296163938902_1200x630.png)
![](/files/galleryphoto/2022/3/1200x630/16655623295276549340_1200x630.png)
Bakı, 12 oktyabr, AZƏRTAC
Fövqəladə Hallar Nazirliyinin (FHN) İdman-sağlamlıq klubunda Azərbaycan Milli Antidopinq Agentliyinin (AMADA) və FHN İdman-sağlamlıq klubunun birgə təşkilatçılığı ilə “Narkotik və dopinqə yox” adı altında seminar keçirilib.
FHN-in mətbuat xidmətindən AZƏRTAC-a bildiriblər ki, tədbirdə İdman-sağlamlıq klubunun əməkdaşları, klubda fəaliyyət göstərən müxtəlif idman növləri üzrə məşqçi müəllimlər, gənc və yeniyetmə idmançılar iştirak ediblər.
Seminarda çıxış edən Antidopinq Agentliyinin təhsil üzrə şöbə müdiri Leyla Hacıyeva iştirakçılara dopinq haqqında ümumi məlumat, nəzarət prosesi, qadağan edilmiş siyahı, qadağan olunmuş maddələrdən istifadənin fəsadları, onların qəbuluna görə tətbiq olunan cəzalar, yarış vaxtı və ondan kənarda test götürülmə qaydaları və digər vacib məqamlar barədə geniş məlumat verib.
Sonra seminar çərçivəsində narkotiklərlə mübarizə mövzusu da xüsusi yer tutub. İdmançılara narkotiklərin zərərləri, onun törətdiyi fəsadlar haqqında məlumatlar verilib, narkotik və digər zərərli vərdişlərdən uzaq durmaq, sağlam həyat tərzinə malik olmaq üçün idmanın əhəmiyyəti vurğulanıb.
Qeyd olunub ki, Prezident İlham Əliyev tərəfindən “Azərbaycan gəncliyi 2017-2021-ci illərdə” Dövlət Proqramı, eyni zamanda, “2015-2025-ci illərdə Azərbaycan gənclərinin İnkişaf Strategiyası” haqqında imzalanmış sənədlərdə gənclərin sağlamlığının qorunması, sağlam həyat tərzinin təbliği, gənclərin fiziki və mənəvi cəhətdən sağlam yetişdirilməsi ölkəmizdə həyata keçirilən gənclər siyasətinin ən əsas istiqamətlərindən biri kimi müəyyən olunub.
Həmçinin interaktiv formada keçirilən seminarda iştirakçıların antidopinq sahəsində bilikləri yoxlanılıb.
Seminarda iştirakçıları maraqlandıran suallar cavablandırılıb, maarifləndirici bukletlər paylanılıb.
Qeyd edək ki, FHN-in İdman-sağlamlıq klubu mütəmadi olaraq narkomaniyaya qarşı mübarizə sahəsində həm əməkdaşların, həm də idmançıların layiqli və sağlam vətəndaş kimi formalaşması, yüksək ideallar ruhunda tərbiyəsi, genefondumuzun qorunması istiqamətində məqsədyönlü addımlar ataraq maarifləndirici tədbirlər keçirir.