Bakı, 24 dekabr, AZƏRTAC

ADA Universiteti Fondunun sponsorluq layihələri şöbəsinin direktoru Firuzə Əliyeva AZƏRTAC-a müsahibə verib. Müsahibəni təqdim edirik.

-Həm təhsil, həm incəsənət sahəsində fəaliyyət göstərirsiniz və hər iki sahədə peşəkarlığınızla seçilirsiniz, bunun sirri nədədir?

-Peşəkarlıq illər ərzində qazanılan, iş mühitində əldə edilən dəyərdir. Bunun ən vacib komponenti əlbəttə ki, əzm, öyrənmə istəyi və daimi inkişafı qarşıya hədəf qoymaqdır. Hədəflərimə gedən yolda əldə etdiklərim peşəkar dəyərlərimdir. Belə demək mümkünsə, hər gün özümlə rəqabət aparıram. Bu səbəbdən də hər gün durmadan inkişaf etməyə, yeniliklər öyrənməyə can atıram.

Qeyd etmək istərdim ki, 2019-cu ildə keçirilən Dünya İqtisadi Forumunun “Gələcəyin bacarıqları, gələcək təhsil” konfransında peşəkar mühitdə yeni bilik və bacarıqların tətbiqinə ehtiyacın olduğu, biznes mühitinin yeni bir dövrə keçdiyi vurğulandı. Bu səbəbdən də öz bilik və bacarıqlarımı inkişaf etdirmək üçün “həyatboyu öyrənmə”ni həyat fəlsəfəmə və gündəlik iş prinsipimə çevirmişəm.

Düşünürəm ki, hər bir peşəkar insanın həyatında onu hərəkətə gətirən arzuları, məqsədləri mövcuddur. Həmin arzu və məqsədlərim hər gün hərəkətə keçməyimə, durmadan inkişaf etməyimə və faydalı olmağıma stimul verir. Çalışdığım təhsil ocağını sevməyim, gənc və dinamik insanların ətrafında olmağım, işimdə məhsuldar olmağıma gətirib çıxarır.

-Növbəti il üçün peşəkar hədəfləriniz hansılardır?

-İlk olaraq, müxtəlif çalarlı məzmuna malik layihələrimin sayını çoxaltmağı, cəmiyyətə fayda verəcək işlərə imza atmağı hədəfləyirəm. Hazırda incəsənətlə texnologiyanın sintezi mövzunda araşdırma aparıram. Bu, insanın intellektual bacarığının incəsənətə tətbiqidir. Bu sintezi şəkillərdə, qrafik görüntülərdə, hətta “Apple” şirkətinin dizaynlarında görmək mümkündür. Bu sahə ilə bağlı araşdırmalarımı davam etdirəcəm.

Hədəflərimdən digəri ötən ildən etibarən ekran səyahətinə başlayan “Persona” verilişinin məzmununu daha da zənginləşdirmək, izləyiciləri öz sahəsinin ən uğurlu simaları ilə televiziya vasitəsilə bir araya gətirməkdir. Yerli izləyici kütləsinin marağını nəzərə alaraq, həmin kütləni öz marağı ilə üst-üstə düşən dünya səviyyəli personajlarla görüşdürmək bu hədəfimin icrasıdır. Mən bu hədəfi, həmçinin özümün vətəndaş olaraq şəxsi sosial məsuliyyətlik layihəm kimi də görürəm. Çünki hər bir layihəyə və ya təşəbbüsə başlamazdan öncə peşəkar maraqlarımla yanaşı, onun cəmiyyətə qazandıracağı dəyər barədə də düşünürəm. Bu baxımdan “Persona” verilişinin növbəti mərhələsi mənim vətəndaş mövqeyimdən irəli gələn məsuliyyətimi əks etdirir.

Vətəndaş mövqeyindən bəhs etmişkən, ötən il səhnələşdirdiyimiz “Vicdan” əsərini xüsusilə qeyd etmək istərdim. Bu əsər pandemiya dövründə özü ilə baş-başa qalan insanın xarakterini ortaya qoymaq, nəticədə onu özünə doğru bir addım atmağa cürətləndirmək üçün fürsət idi. Məhz bu fürsət "Vicdan" filmini ərsəyə gətirdi.

-Cəmiyyətə faydalı olmaqdan bəhs etdiniz. Sizin layihələriniz cəmiyyətə hansı faydanı verir?

- Bəhs etdiyiniz layihələrim ilk növbədə insanları maarifləndirir. İncəsənətin incə ruhunu ekranda əks etdirməklə onun mədəniyyətlər arasında körpü rolu oynadığını izləyicilərə vizual olaraq çatdırır. İncəsənətin əsas mahiyyətini tamaşaçılara sevdikləri, tanınmış simaların dili ötürür. Efirdə görünən tanınmış, öz sahəsinin peşəkarına çevrilən qonaqlar sanki tamaşaçılarla virtual olaraq ünsiyyət qurur, onları faydalı işlər görməyə, öz fərqini ortaya qoymağa səsləyir. Növbəti il “Persona” verilişində 5 fərqli xarici qonağımız olacaq. Onlar dünyanın müxtəlif yerlərində yaşayan, öz uğurları ilə geniş kütlənin sevimlisinə çevrilən peşəkarlardır. Həmin şəxslər elm, təhsil, incəsənət sahələrində fəaliyyət göstərənlərdir.

-Bilirik ki, bu yaxınlarda “Vicdan” əsərinin təqdimatı baş tutacaq. Niyə məhz indi?

-Geridə qoymağa hazırlaşdığımız bu il bir çox əlamətdar hadisələrlə yadda qaldı. Xüsusilə pandemiya psixoloji ruh halımıza müxtəlif formada təsir etdi. Bir çoxları bu dövr ərzində özünü daha yaxından tanımağa nail oldu, belə demək mümkünsə, öz daxili dünyasını kəşf etdi. Bəziləri sosial mühitini, digərləri isə hətta iş sferasını dəyişməyə başladı. Gördüyünüz kimi, pandemiya müəyyən mənada bizə özümüz barədə düşünməyə vaxt qazandırdı. “Vicdan” əsərinin də məhz elə bu dövrdə ərsəyə gəlməsi və səhnələşdirilməsi bundan qaynaqlanır. Biz çalışdıq ki, bu qeyri-müəyyənlik dövründə onları öz vicdanının səsini dinləməyə təşviq edək.

- Bu əsəri geniş izləyici kütləsi qarşısında canlı olaraq təqdim etməyi düşünürsünüzmü?

-Maraqlısı budur ki, “Vicdan” əsəri mənim aktrisalıq fəaliyyətimin başlanğıc nöqtəsinə çevrilib, yəni bu əsəri səhnələşdirərkən və ya film halına salarkən mən əslində, öz bacarıqlarımı nümayiş etdirmişəm. Yəqin ki, “Vicdan”ın mənə qazandırdığı ən böyük nailiyyət məhz elə budur. Bu əsər vasitəsilə Rus Dram Teatrında Zaur İsgəndərovla tərəf müqabili oldum. Hər kəsin özünə qapanmağa meyilli olduğu həmin dövrdə biz, qısametrajlı, psixoloji film çəkdik.

Film artıq yayımlanmağa tam hazırdır və 2022-ci il yanvarın 15-də onlayn platformalar üzərindən nümayiş etdiriləcək. Əli Zamansoyun rejissoru olduğu bu film əvvəlcə yutubda nümayiş olunacaq. Filmlə bağlı digər yaddaqalan məqamlardan da biri odur ki, filmdə İsfar Sarabskinin musiqi əsərindən istifadə olunub.

Hər kəsi filmi izləməyə və “Vicdan” vasitəsilə öz daxili aləminə yenidən səyahət etməyə dəvət edirəm. Eyni zamanda, oxucularınızı qarşıdan gələn Dünya Azərbaycanlılarının Həmrəylik Günü və Yeni il münasibətilə təbrik edir, onlara öz dəyərlərini nümayiş etdirə biləcək faydalı layihələrə imza atmalarını arzu edirəm.

-Maraqlı müsahibə üçün təşəkkür edirik.