GƏNC MUĞAM İFAÇILARI ŞƏKİ MUSİQİSEVƏRLƏRİNİN QONAĞI OLMUŞLAR
AZƏRTAC xəbər verir ki, Şəki Dövlət Dram Teatrında Mədəniyyət və Turizm Nazirliyinin xətti ilə cari il mayın 14-18-də Astara şəhərində keçirilən Uşaq muğam ifaçılarının IV Respublika müsabiqəsi qaliblərinin iştirakı ilə konsert olmuşdur.
Şəki Şəhər İcra Hakimiyyəti başçısının müavini Zərinə Cavadova müsabiqə qaliblərinə uğurlar arzulamış, son illər respublikamızda mədəniyyət və incəsənətin inkişafına ölkə rəhbərliyi tərəfindən böyük diqqət və qayğı göstərildiyini bildirmiş, milli musiqimizin, xüsusilə muğam sənətinin inkişafında Heydər Əliyev Fondunun prezidenti, YUNESKO-nun və İSESKO-nun xoşməramlı səfiri Mehriban xanım Əliyevanın xidmətlərini xüsusi vurğulamışdır.
Müsabiqənin münsiflər heyətinin sədri, xalq artisti Canəli Əkbərov, Mədəniyyət və Turizm Nazirliyinin məsul əməkdaşı Oqtay Muxtarov yaradılan şəraitə görə şəhər rəhbərliyinə minnətdarlıqlarını bildirmiş, müsabiqənin şərtləri və nəticələri barədə məlumat vermişlər. Diqqətə çatdırılmışdır ki, Azərbaycan xalqının mədəni sərvətlərini qoruyub saxlamaq və inkişaf etdirmək, muğam sənətinə, xalq mahnıları və təsniflərə marağı artırmaq, yeni istedadlı gənc muğam ifaçılarını aşkara çıxarmaq məqsədilə keçirilən bu müsabiqədə 56 rayonu təmsil edən 152 ifaçı iştirak etmişdir. Müsabiqə qaliblərinin iştirakı ilə artıq Xırdalan və Sumqayıt şəhərlərində, Şamaxı, Qəbələ və Balakən rayonlarında konsertlər verilmişdir.
Şəkidə keçirilən konsert proqramında 12 iştirakçı - müsabiqənin qalibi şuşalı Nigar Məmmədova, ikinci yerə çıxmış sumqayıtlı Qurban Həsənov, III yerin sahibi gəncəli Sərxan Qasımov, IV yerə layiq görülmüş astaralı Elyana Məhərrəmli, habelə həvəsləndirici mükafatçılar iştirak etmişlər. Onların ifa etdikləri muğam parçaları, təsnif və xalq mahnıları tamaşaçılar tərəfindən hərarətli alqışlarla qarşılanmışdır.
######
Bölmənin digər xəbərləri
