GƏNCLƏR, İDMAN VƏ TURİZM NAZİRLİYİNİN NÜMAYƏNDƏ HEYƏTİ TÜRKİYƏDƏ SƏFƏRDƏ OLMUŞDUR
Gənclər, idman və turizm naziri Əbülfəz Qarayevin başçılıq etdiyi nümayəndə heyəti avqustun 15-17-də Türkiyədə səfərdə olmuşdur. Səfər zamanı Türkiyənin idman və gənclərlə iş üzrə dövlət naziri Fikrət Ünlü, turizm naziri Mustafa Taşar və dövlət naziri Rəşad Doğru ilə görüşlər keçirilmişdir.
Turizm Nazirliyində görüş zamanı ölkəmizdə turizmin inkişafına sərmayələrin cəlb edilməsi, birgə turist obyektlərinin inşası, Türkiyənin dəstəyi ilə Azərbaycanda turizm üzrə tədris mərkəzinin yaradılması, respublikamızın mütəxəssislərinin Türkiyədə qısamüddətli kurslarda iştirakı, turizm əlaqələrinin genişləndirilməsi və inkişaf perspektivləri müzakirə olunmuşdur.
Dövlət naziri Fikrət Ünlü ilə görüşdə idman, idman təhsili sahəsində əlaqələrin genişləndirilməsi müzakirə edilmiş və protokol imzalanmışdır. Türkiyə Respublikasının gənclər və idman məsələləri üzrə baş direktoru Kamal Mutlu ilə görüşdə ölkələrimizdə idman növləri üzrə rəsmi yarışlara hər iki tərəfin idmançılarının qatılmaları, birgə təlim-məşq toplantılarının keçirilməsi, məşqçilik və hakimlik seminarlarına Türkiyə və Azərbaycan mütəxəssislərinin cəlb edilməsi məsələləri diqqət mərkəzində olmuşdur. Razılığa əsasən, hər iki ölkənin idman təmayüllü tədris müəssisələrinin tələbə və elmi-pedaqoji kadrlarının mübadiləsi nəzərdə tutulmuşdur.
Görüşlərdə “İdman sahəsində əməkdaşlıq haqqında” sazişin (1994) və “Gənclik və idman sahəsində əməkdaşlıq haqqında” əlavə protokolun (1997) əhəmiyyəti və həmin sənədlər çərçivəsində əməkdaşlığın genişləndirilməsinin vacibliyi vurğulanmışdır.
Nümayəndə heyəti Türkiyə Səyahət Agentlikləri Birliyinin (TÜRSAB) prezidenti Bşaran Ulusoy ilə də görüşmüşdür. Söhbət zamanı Azərbaycanın turist şirkətləri ilə Türkiyənin səyahət agentlikləri arasında əlaqələrin yaradılması məsələsinə toxunulmuşdur. Azərbaycanın turizm potensialı və turist şirkətləri ilə yaxından tanışlıq məqsədi ilə TÜRSAB-ın nümayəndə heyəti ölkəmizə səfərə dəvət edilmişdir.
Azərbaycan nümayəndə heyətinin üzvləri Anadolu Otelçilik və Turizm Sənəti Litseyinin fəaliyyəti ilə də tanış olmuşlar.
Bölmənin digər xəbərləri
