Gənclər Kitabxanasında Müstəqilliyin Bərpası Günü ilə əlaqədar silsilə materiallar hazırlanıb
Bakı, 18 oktyabr, AZƏRTAC
Cəfər Cabbarlı adına Respublika Gənclər Kitabxanasında 18 Oktyabr - Müstəqilliyin Bərpası Günü ilə əlaqədar elektron məlumat bazası, virtual və ənənəvi kitab sərgisi hazırlanıb.
Kitabxanadan AZƏRTAC-a bildirilib ki, “18 Oktyabr - Müstəqilliyin Bərpası Günü” adlı elektron bazada bu günün təsis edilməsinə dair qəbul edilən rəsmi sənədlər, görkəmli şəxslərin söylədikləri dəyərli fikirlər, “Müstəqilliyin bərpası və qorunub saxlanılması”, “Ümummilli Lider Heydər Əliyev müasir müstəqil Azərbaycan dövlətinin memarı və qurucusudur”, “Heydər Əliyev yolunun davamçısı” kimi tam mətnlər yer alır.
Elektron bazada Azərbaycan Respublikasının dövlət simvolları haqqında məlumat verilir, bu mövzuları əhatə edən kitabların, dövrü mətbuat nümunələrinin siyahısı təqdim olunur. Kitabxana əməkdaşları tərəfindən hazırlanan elektron bazada Müstəqilliyin Bərpası Günü ilə əlaqədar ölkə başçısına ünvanlanan təbrik və paylaşımlar, əlamətdar günlə əlaqədar təşkil edilən tədbir və konsert proqramlarının siyahısı da yer alır. Kitabxananın rəsmi saytında yerləşdirilən elektron bazada “Müstəqilliyimiz əbədidir”, “İnkişaf məqsədimizdir”, “Foto və videoqalereya”, “Virtual sərgi” kimi bölmələr də sərgilənir.
Elektron bazanın birinci səhifəsində yer alan virtual kitab sərgisində Ulu Öndər Heydər Əliyevin Azərbaycan dövlətçiliyi, müstəqillik, onun mahiyyəti, insan həyatında daşıdığı müstəsna əhəmiyyəti haqqında söylədiyi dəyərli fikirlər, tövsiyələr yer alır. Materiallarda müdrik rəhbər, uzaqgörən siyasi lider, Prezident İlham Əliyevin rəhbərliyi altında müstəqilliyini qoruyub saxlayan, günü-gündən daha da güclənən, beynəlxalq siyasi arenada müstəsna nüfuza malik olan Azərbaycan dövlətinin şanlı Qələbəsini, Zəfər tarixini əks etdirən videogörüntülər təqdim edilir.
Virtual kitab sərgisində “Heydər Əliyev. Azərbaycan Parlamenti”, “İlham Əliyev. İnkişaf - məqsədimizdir”, “Heydər Əliyev. Müstəqilliyimiz əbədidir”, “Heydər Əliyev - İlham Əliyev. Azərbaycançılığın Zəfər yolu”, “Müstəqillik yollarında: Liderlik missiyası”, “Heydər Əliyev irsində Azərbaycan tarixi məsələləri”, “Müstəqil Azərbaycan dövlətinin qurucusu”, “Müstəqillik dövrü Azərbaycan ədəbiyyatı” kimi kitabların qısa annotasiyası, dövrü mətbuat nümunələri nümayiş olunur.
Müstəqilliyin Bərpası Günü ilə əlaqədar hazırlanan materiallar kitabxananın rəsmi saytında yerləşdirilib.
Bölmənin digər xəbərləri
