GƏNCLƏRİN SİYASİ DİALOQU GÜNÜMÜZÜN TƏLƏBİDİR
AZƏRTAC-ın xüsusi müxbiri xəbər verir ki, Rusiya Dövlət Duması Gənclərin İşləri üzrə Komitəsinin təşkilatçılığı ilə Moskvada “MDB ölkələrində gənclərin dialoqu və beynəlxalq diplomatiyanın imkanları” mövzusunda “dəyirmi masa” keçirilmişdir.
Komitənin sədri Pavel Tarakanov çıxışında diskussiya iştirakçılarının diqqətini rus dilinin MDB məkanında mədəni və iqtisadi əlaqələr, qarşılıqlı fəaliyyət üçün birləşdirici vasitə kimi qorunub saxlanılması probleminə yönəldərək demişdir: “Təəssüf ki, Birlik ölkələrində rus dilini bilən gənclərin sayı ilbəil azalır. Bu isə şəxsi və ölkələrarası münasibətlərin möhkəmlənməsinə xeyir gətirmir”. P.Tarakanovun sözlərinə görə, MDB ölkələrində rus dilinin öyrənilməsi “təşviq edilməlidir”.
MDB-nin İşləri və Həmvətənlərlə Əlaqələr üzrə Komitəsi sədrinin müavini Tatyana Moskalkova rus dilinin 246 milyon vətəndaşın nadir ünsiyyət vasitəsi kimi qorunub saxlanılmasından danışarkən vurğulamışdır ki, gənclərin siyasi dialoqa cəlb edilməsi bu günün vizit kartı olmuşdur. T.Moskalkova Abxaziya, Cənubi Osetiya, Dnestryanı bölgə və Dağlıq Qarabağda dondurulmuş münaqişələrin həllini, Latviyada qeyri-vətəndaşlar problemini, Rusiya-Belarus İttifaq Dövlətinin yaradılmasını, MDB məkanında təhlükəsizlik zolağının möhkəmlənməsini və dövlət miqrasiya siyasətinin formalaşdırılmasını gələcək diplomatlar nəslinin payına düşəcək əsas problemlər adlandırmışdır.
Beynəlxalq məsələlər üzrə Komitənin üzvü Tatyana Voronova isə əlavə etmişdir: “Bizi birləşdirən cəhətlərə müraciət etmək vaxtı çatmışdır. Ümumi kommunikativ məkanı inkişaf etdirmək lazımdır. Birgə gələcəyimiz ölkələrimizin qarşılıqlı əlaqələrinin perspektivlərini necə başa düşməyimizdən, birlikdə güclü olduğumuzu anlamağımızdan asılı olacaqdır”.
Fəal vətəndaş diplomatiyasının MDB-nin humanitar məkanının genişlənməsinə, Birliyə daxil olan ölkələrin gəncləri arasında əməkdaşlığın möhkəmlənməsinə xidmət edəcəyi qənaətinə gələn “dəyirmi masa” iştirakçıları “Avrasiya gənclər diplomatiyası” Beynəlxalq Assosiasiyasının təsis edilməsi təklifini irəli sürmüşlər.
Bölmənin digər xəbərləri
