GENETİK EHTİYATLARIN İDARƏ OLUNMASINDA AZƏRBAYCANIN TƏCRÜBƏSİ BEYNƏLXALQ MİQYASDA TƏQDİR EDİLİR
Genetik ehtiyatlar sahəsində idarəetmə və əlaqələndirmə sisteminin Azərbaycan modeli Cənubi Qafqaz və Mərkəzi Asiya regionunda ən mütərəqqi və səmərəli model hesab olunur, digər ölkələrə bu modeldən və müvafiq sahədə Azərbaycan təcrübəsindən nümunə götürmək tövsiyə edilir.
AZƏRTAC xəbər verir ki, bu fikir Daşkənddə keçirilmiş Mərkəzi Asiya və Transqafqaz Şəbəkəsinin əlaqələndirmə Şurasının 5-ci müşavirəsinin leytmotivinə çevrilmişdir.
Tədbirdə respublikamızı təmsil edən Genetik Ehtiyatlar İnstitutunun direktoru Zeynal Əkpərov Azərbaycanda akademik C.Əliyevin rəhbərliyi ilə son 10 ildə həyata keçirilmiş Milli Proqram çərçivəsində görülmüş tədbirlər, əldə olunmuş nailiyyətlər barədə məlumat vermişdir. Qeyd edilmişdir ki, BMT-nin Ərzaq və Kənd Təsərrüfatı Təşkilatı ilə birgə respublikamızda ərzaq və kənd təsərrüfatı bitki genetik ehtiyatları üzrə Qlobal Fəaliyyət Planının yerinə yetirilməsinin monitorinqinin həyata keçirilməsi, bitki genetik ehtiyatları üzrə Ölkə Şəbəkəsinin və Milli İnformasiya Mübadiləsi Mexanizminin qurulması, internet portalının yaradılması, bitki genetik ehtiyatlarının mövcud vəziyyətini əks etdirən 2-ci Milli Hesabatın hazırlanması son bir ildə Azərbaycanda müvafiq sahədə əhəmiyyətli irəliləyişə nail olunmasının sübutudur. Növbəti 10 il üçün nəzərdə tutulmuş Bitki Genetik Ehtiyatları (BGE) üzrə Milli Strategiya və Fəaliyyət Planı, strategiyanın məqsədi, istiqamət və vəzifələri iştirakçıların diqqətinə çatdırılmışdır.
Müşavirədə BGE üzrə Regional Strategiyanın layihəsi müzakirə olunmuş, onun qısa müddət ərzində yenidən işlənməsi barədə qərar qəbul edilmişdir. Regional Strategiyanın yeni redaksiyasının hazırlanması zamanı Azərbaycan tərəfinin təqdim etdiyi məruzə, Milli Strategiya layihəsi və müvafiq təkliflər paketinin nəzərə alınması məqsədəuyğun hesab edilmişdir.
Bölmənin digər xəbərləri
