Azərbaycan Milli Elmlər Akademiyasının Geologiya İnstitutunda “Neftli-qazlı sahələrdə seysmik təhlükə və riskin qiymətləndirilməsi” mövzusunda beynəlxalq konfrans işə başlamışdır. Şamaxı zəlzələsinin 100 illiyi ilə əlaqədar Geologiya İnstitutu və Birləşmiş Yer Fizikası İnstitutu tərəfindən təşkil olunmuş konfransın işində Azərbaycan, Rusiya, Gürcüstan alimləri iştirak edirlər. 

Konfrans iştirakçıları Xəzər Dəniz Gəmiçiliyinin “Merkuri-2” bərəsinin qəzaya uğraması nəticəsində həlak olanların və Moskvadakı faciəli hadisələrin qurbanlarının xatirəsini bir dəqiqəlik sükutla yad etdilər.

Geologiya İnstitutunun direktoru, akademik Akif Əlizadə konfransın mövzusunun aktuallığından danışaraq dedi ki, son 10-15 ildə Xəzər və Qafqaz regionlarında geodinamik proseslərin fəallaşdığı nəzərə çarpır və bu fəallıq zəlzələlərin, sürüşmələrin baş verməsi, palçıq vulkanlarının püskürməsi və yeraltı suların səviyyəsinin qalxması hallarının artması ilə müşayiət olunur. Bu günlərdə Səngi Muğan adasında palçıq vulkanı püsgürmüşdür. İnstitutun bir qrup alimi vəziyyəti öyrənmək üçün oraya getmişdir.

Akademik Əlizadə xatırlatdı ki, bu il viranedici Şamaxı zəlzələsinin 100 ili tamam olur. Həmin zəlzələ nəticəsində bu qədim Azərbaycan şəhəri tamamilə dağılmışdı. Qafqazda tammiqyaslı seysmoloji tədqiqatlara məhz o vaxtdan başlanılmış və ilk ”Şamaxı” seysmik stansiyası yaradılmışdır.

Sonra MEA-nın respublika seysmologiya xidməti mərkəzinin direktoru, MEA-nın müxbir üzvü Arif Həsənov çıxış edərək, ölkəmizdə seysmik müşahidələrin inkişaf tarixindən danışdı. O bildirdi ki, Azərbaycanda 2000-ci il noyabr zəlzələsindən sonra müasir avadanlıq alınması üçün tender elan edilmiş və artıq ölkəyə 14 ədəd rəqəmli telemetrik stansiya gətirilmişdir. Bu stansiyalar gərginliyin səviyyəsini, seysmik təhlükənin dərəcəsini real zaman miqyasında müəyyənləşdirməyə imkan verəcəkdir.

Konfransda təbii və texnogen xarakterli fövqəladə halların monitorinqi və proqnozlaşdırılması, Bakı-Ərzurum qaz kəməri marşrutunun seçilməsinin əsaslandırılması, zəlzələ ocağı zonalarının formalaşmasında fiziki-kimyəvi proseslərin rolu məsələlərinə toxunulacaqdır.