Geologiya İnstitutunun alimləri Geokimyəvi Tədqiqatlar Mərkəzi təşkil etməyi nəzərdə tuturlar
Bakı, 20 iyul (AZƏRTAC). Azərbaycan Milli Elmlər Akademiyası Geologiya İnstitutunun “Azərbaycan nefti” layihəsi Azərbaycan Respublikasının Prezidenti yanında Elmin İnkişafı Fondu tərəfindən 1 milyon manatlıq qrant mükafatına layiq görülmüşdür.
İnstitutun mətbuat xidmətindən AZƏRTAC-a bildirmişlər ki, bu elm müəssisəsinin alimləri layihə çərçivəsində Geokimyəvi Tədqiqatlar Mərkəzi təşkil etməyi nəzərdə tuturlar. Burada qurulacaq geokimyəvi laboratoriyada neftlə əlaqəli xromata-kütlə spektrometriyası, termiki analiz, kalorimetriya, termoqravimetriya, element analizi, dinamik işıq paylanması və digər üsullarla tədqiqatlar aparılacaqdır. Bu işlər üçün İsveçrənin “Perkin Elmer” şirkətindən müasir elmi-tədqiqat avadanlığı alınacaqdır.
AMEA-nın vitse-prezidenti, Geologiya İnstitutunun direktoru, akademik Akif Əlizadə bildirmişdir ki, neftin mənşəyi ilə bağlı bir çox elmi məsələ geokimyəvi tədqiqatların həll olunmamış və aktual mövzuları olaraq qalır. Bunu ötən ay Bakıda keçirilmiş “Böyük dərinliklərin karbohidrogen potensialı: gələcəyin enerji resursları - reallıq və proqnoz” mövzusunda birinci beynəlxalq konfransdakı çıxışlar da sübut etmişdir. Akademik hesab edir ki, Geokimyəvi Tədqiqatlar Mərkəzi geologiya elmindəki bu sədləri aşmaq istiqamətində mühüm töhfələr verə bilər.
İnstitut adıçəkilən mərkəzin vasitəsilə gənc alimlərin xarici elmi qurumlardakı neft geologiyası üzrə treninqlərdə iştirakını təmin etməyi də nəzərdə tutur.
Bölmənin digər xəbərləri
