QAN YADDAŞI
Gürcüstan azərbaycanlılarının Marneulidəki mədəniyyət mərkəzi Azərbaycanlıların Soyqırımı Günü ilə bağlı tədbir keçirmişdir
Tbilisi, 31 mart (AZƏRTAC). Gürcüstan azərbaycanlılarının Marneulidəki mədəniyyət mərkəzində Azərbaycanlıların soyqırımı günü ilə əlaqədar tədbir keçirilmişdir.
Tədbir iştirakçıları soyqırımı qurbanlarının xatirəsini bir dəqiqəlik sükutla yad etmişlər. Mədəniyyət mərkəzinin rəhbəri Fazil Həsənov 31 mart Azərbaycanlıların soyqırımı gününün təsis olunması sayəsində xalqın tarixi yaddaşının oyandığı, illərlə üstündən sükutla keçilmiş bu faciənin dünya ictimaiyyətinin diqqətinə çatdırılması baxımından böyük əhəmiyyət kəsb etdiyinə diqqət çəkmişdir. Qeyd edilmişdir ki, ümummilli liderimiz Heydər Əliyev hakimiyyətə qayıtdıqdan sonra, 1998-ci il martın 27-də xalqımıza qarşı törədilmiş soyqırımı tarixi gününün rəsmən qeyd olunması məqsədilə “Azərbaycanlıların soyqırımı haqqında” Fərman imzalamış və artıq 13 ildir ki, 31 mart Azərbaycanlıların Soyqırımı Günü kimi qeyd olunur. Azərbaycan həqiqətləri dünyaya ayaq açır. F.Həsənov erməni hiyləgərliyinin bütün cəhdlərinə baxmayaraq Azərbaycan rəhbərliyinin, diplomatiyasının son vaxtlardakı uğurlu fəaliyyəti nəticəsində əsl həqiqətin meydana çıxdığını demiş və bu sahədə xarici ölkələrdə məskunlaşmış azərbaycanlıların, o cümlədən Gürcüstan azərbaycanlılarının da üzərinə böyük vəzifələr düşdüyünü bildirmişdir.
Çıxışlarda 1918-ci ilin mart günlərinə ekskurs edilmiş və qeyd olunmuşdur ki, 1918-ci ilin martında Stepan Şaumyan başda olmaqla Bakı Sovetinin dəstəyi ilə daşnaksütyun erməni millətçi təşkilatının silahlı dəstələri azərbaycanlı əhalinin kütləvi surətdə qırğını və talanını həyata keçirmişlər. Həmin cəza əməliyyatları “Əksinqilab qüvvələri ilə mübarizə” şüarı altında aparılmışdır. Cəmi bir neçə gün ərzində çoxlu sayda günahsız azərbaycanlı qətlə yetirilmiş, məscidlər, məktəblər tarixi abidələr dağıdılmışdır. Bakı şəhərindən sonra kütləvi qətllər Şamaxıda, Qubada, Azərbaycanın digər rayon və kəndlərində də həyata keçirilmişdir.
Borçalının məşhur ağalarından olan İsrafil ağanın nəvəsi İsrafil Acalov, şair, Gürcüstan Aşıqlar Birliyinin rəhbəri Osman Əhmədoğlu, “Meydan” jurnalının redaktoru Əlixan Binnətoğlu və başqaları ötən əsrin əvvəllərində ermənilərin Borçalının azərbaycanlı əhalisinə qarşı da soyqırımı törətdiklərini və onların bu məkrli siyasətdən əl çəkmədiklərini vurğulamışlar. Qeyd etmişlər ki, bu gün xalqımızın öz qan yaddaşını vərəqləmək və ermənilərin azərbaycanlılara qarşı törətdikləri vəhşiliklərin gələcək nəslə çatdırılması baxımından böyük əhəmiyyət kəsb edir. Erməni əsarətində olan Azərbaycan torpaqlarının tezliklə xilas ediləcəyinə əminlik ifadə olunmuşdur.
Tədbir iştirakçıları soyqırımını əks etdirən fotoşəkillərdən və kitablardan ibarət sərgiyə baxmışlar.
X X X
Həmin gün “Gürcüstan mənim vətənimdir” cəmiyyəti də Azərbaycanlıların Soyqırımı Gününə həsr olunmuş tədbir keçirmişdir.
Cəmiyyətin rəhbəri Əli Babayev ermənilərin xalqımıza qarşı törətdiyi cinayətlərdən söhbət açmış, bununla əlaqədar tarixi faktlardan misallar gətirmişdir.
Tədbirdə ictimaiyyət nümayətləri və 12 qeyri-hökumət təşkilatının təmsilçiləri iştirak etmişlər.
Tədbir iştirakçıları erməni separatizminə son qoyulması üçün təsirli tədbirlər görülməsi çağırışı ilə dünya ictimaiyyətinə müraciət qəbul etmişlər.
İslam Əliyev
AZƏRTAC-ın xüsusi müxbiri
Tbilisi