SİYASƏT
GÜRCÜSTAN İCTİMAİYYƏTİ VƏ MƏTBUATI AZƏRBAYCAN VƏ ERMƏNİSTAN PREZİDENTLƏRİNİN GÖRÜŞÜNƏ BÖYÜK ÜMİD BƏSLƏYİR
Azərbaycan Prezidenti Heydər Əliyev ilə Ermənistan Prezidenti Robert Koçaryanın bu günlərdə Naxçıvan Muxtar Respublikasının Sədərək sərhəd rayonunda keçirilmiş təkbətək görüşü dost Gürcüstanın ictimaiyyətində və kütləvi informasiya vasitələrində böyük marağa səbəb olmuşdur.
Gürcüstan dövlət televiziyası, Tbilisidə çıxan “Alia”, “Sakartvelos Respublika”, “Axali taoba”, “Svobodnaya Qruziya”, “Mnoqonasionalnaya Qruziya”, “Nezavisimaya qazeta”, “Gürcüstan” və hətta ermənicə nəşr edilən “Varastan” qəzetləri Azərbaycan iqtisadiyyatının ağır böhrandan çıxarılıb sürətli inkişaf yoluna qədəm qoyması, əhalinin rifah halının getdikcə yaxşılaşdırılması, dövlət müstəqilliyinin möhkəmləndirilməsi və ölkənin beynəlxalq aləmdə nüfuzunun yüksəldilməsi sahəsində Prezident Heydər Əliyevin məqsədyönlü fəaliyyəti haqqında ətraflı məlumat verərək, gürcü xalqına nə kimi yaxşılıqlar etdiyini, diqqət və qayğısını Gürcüstandan əsirgəmədiyini xatırladaraq, onun R.Koçaryanla son görüşünü geniş işıqlandırmış, ictimaiyyət nümayəndələrinin, ziyalıların bu görüş barədə rəylərini dərc etmişlər. Televiziya verilişlərində və qəzet yazılarında belə bir inam ifadə edilir ki, münaqişədə olan iki dövlətin başçılarının görüşü Dağlıq Qarabağ probleminin ədalətlə nizama salınmasını sürətləndirəcək və eyni zamanda, abxaz-gürcü münaqişəsinin də ədalətlə həllinə yol açacaqdır.
Şahismayıl Məmmədov
AZƏRTAC-ın xüsusi müxbiri
Tbilisi