Gürcüstan parlamenti Kutaisidə fəaliyyətini başa vurub
Tbilisi, 28 dekabr, AZƏRTAC
Gürcüstan parlamenti Kutaisidə fəaliyyətini başa vurub və qanunverici orqanın yeni sessiyası artıq paytaxt Tbilisidə başlayacaq.
AZƏRTAC xəbər verir ki, Gürcüstanın yeni prezidentinin dekabrın 16-da keçirilmiş andiçmə mərasimindən dərhal sonra qüvvəyə minən konstitusiyada qanunverici orqanın hansı şəhərdə fəaliyyət göstərməsi ilə bağlı konkret müddəa yoxdur. Konstitusiyanın əvvəlki redaksiyasında isə parlamentin ölkənin ikinci böyük şəhəri olan Kutaisidə fəaliyyət göstərməsi qeyd olunmuşdu.
Dekabrın 27-də Kutaisidə parlamentin sonuncu növbədənkənar sessiyası keçirilib. Parlamentin sədri İrakli Kobaxidze çıxışında Kutaisidə sonuncu iclasın keçirildiyini bildirib. Günün sonunda deputatlar və parlament administrasiyasının əməkdaşları xatirə şəkli çəkdiriblər.
Məlumat üçün qeyd edək ki, Gürcüstan parlamenti 2012-ci ildə sabiq prezident Mixeil Saakaşvilinin təşəbbüsü ilə Kutaisiyə köçürülmüşdü. M.Saakaşvili bildirmişdi ki, bu yolla təkcə paytaxt Tbilisinin deyil, regionların da inkişafına nail olmaq niyyətindədir.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
