SİYASƏT
HƏMSƏDRLƏR DAĞLIQ QARABAĞ MÜNAQİŞƏSİNİN HƏLLİ İLƏ BAĞLI YENİ TƏKLİFLƏR HAZIRLAYIBLAR
Parlamentin sədri ölkələrimiz arasında əlaqələrin tarixinin orta əsrlərə təsadüf etdiyini, böyük siyasətçi Heydər Əliyevin 1993-cü ildə hakimiyyətə ikinci dəfə qayıdışından sonra münasibətlərimizin yeni inkişaf mərhələsinə qədəm qoyduğunu bildirdi. Qeyd etdi ki, Azərbaycan Prezidenti Heydər Əliyevin Fransaya çoxsaylı səfərləri zamanı aparılan danışıqlar, imzalanmış sənədlər iki ölkə arasında əlaqələrin inkişafına xüsusi təkan vermişdir.
Ermənistan-Azərbaycan, Dağlıq Qarabağ münaqişəsinin tarixi, başvermə səbəbləri və ağır nəticələri barədə qonaqlara ətraflı məlumat verən Murtuz Ələsgərov problemin həlli ilə məşğul olan ATƏT-in Minsk qrupu həmsədrlərinin fəaliyyətindən narazılığını diqqətə çatdırdı. Minsk qrupu hələ də heç bir iş görməyib, baxmayaraq ki, həmsədrlər təcavüzkara qarşı sanksiyaların tətbiq edilməsində, BMT Təhlükəsizlik Şurasının məlum qətnamələrinin yerinə yetirilməsində xüsusi rola malikdirlər. Həmsədrlər öz fəaliyyətlərində dönüş yaratmalıdırlar. Azərbaycan xalqı bu təşkilatdan konkret təkliflər gözləyir. Əks halda, xalq öz torpaqlarını başqa vasitələrlə azad edəcəkdir. Fransa ATƏT-in Minsk qrupundakı həmsədrlərdən biri olduğu üçün bu məsələyə ciddi diqqət yetirməlidir.
Səmimi qəbul üçün minnətdarlığını bildirən Ambruaz Düpon səfər təəssüratlarından danışdı. Qeyd etdi ki, bununla üçüncü dəfədir ki, Azərbaycana səfər edir və müşahidə etdiyi inkişaf onda ölkəmiz haqqında böyük ümidlər yaradır. Fransa Azərbaycanı özünə yaxın müttəfiq sayır və bunun üçün də münasibətlərin inkişafına xüsusi maraq göstərir. Nümayəndə heyəti Baş nazir, nazirlər və digər rəsmi şəxslərlə keçirdiyi görüşlərdə bəzi məsələləri müzakirə etmiş və müsbət nəticələr əldə olunmuşdur. Bakıda Fransa Mədəniyyət Mərkəzinin açılması barədə əldə olunan razılıq xüsusilə qiymətləndirilir. Fransalı qonaqlar Senatda Azərbaycan rəssamlarının əsərlərindən ibarət sərginin açılmasına çalışırlar.
Dağlıq Qarabağ münaqişəsinin həllində Fransanın maraqlı olduğunu vurğulayan Ambruaz Düpon Minsk qrupu həmsədrlərinin yeni təkliflər hazırladığını bildirdi. Bir qədər əvvəl Ermənistanda, indi isə Azərbaycanda seçkilər keçirildiyi üçün hələlik bu təkliflər açıqlanmır. Azərbaycanda seçkilər başa çatdıqdan sonra Fransa prezidenti və Senatın sədri danışıqlar prosesinin sürətlənməsi və münaqişənin tezliklə həllinə nail olunması üçün səylərini artıracaqlar. Hətta Senatın sədri Kristian Ponslenin bununla bağlı Azərbaycana səfəri də planlaşdırılıb.
Sonra görüşdə qarşılıqlı maraq doğuran digər məsələlər ətrafında fikir mübadiləsi aparılmışdır.