HƏR İL 100-DƏN ÇOX AZƏRBAYCAN GƏNCİ TƏHSİL ALMAQ ÜÇÜN
ABŞ-A GÖNDƏRİLƏCƏKDİR
Hər il 100-dən çox Azərbaycan gənci ABŞ-da təhsil alacaq, azərbaycanlı alimlər müxtəlif mübadilə proqramları üzrə bu ölkəyə göndəriləcəklər.
AZƏRTAC xəbər verir ki, bunu ABŞ-ın Azərbaycandakı səfiri Ann Ders ABŞ dövlət katibinin təhsil və mədəniyyət məsələləri üzrə köməkçisi Qoli Amerinin şərəfinə təşkil edilmiş qəbulda bildirmişdir.
Səfir demişdir ki, Prezident İlham Əliyev Azərbaycan ilə ABŞ arasında təhsil sahəsində əməkdaşlıq məsələlərinə ciddi fikir verir.
ABŞ dövlət katibinin köməkçisi Qoli Ameri ABŞ ilə Azərbaycanın ikitərəfli münasibətlərinin möhkəmlənməsinə kömək edən təhsil proqramlarının əhəmiyyətini vurğulamışdır.
O bildirmişdir ki, Azərbaycan Təhsil Nazirliyi ilə imzalanmış qarşılıqlı anlaşma memorandumuna görə, Fulbrayt proqramında Azərbaycan vətəndaşlarının iştirakının genişləndirilməsi nəzərdə tutulur.
Xanım Ameri azərbaycanlı gənclərin xaricdə oxumalarını yüksək qiymətləndirmiş və ümid etdiyini bildirmişdir ki, onların əksəriyyəti məhz ABŞ-da təhsil alacaqdır.
######
Bölmənin digər xəbərləri
