Ağdam, 9 dekabr, AZƏRTAC

Hər bir xalqın milli azadlıq və istiqlaliyyət tarixində xilaskar rolunu oynayan dahi insanlar var. Həmin dahilər öz qətiyyətləri ilə mənsub olduqları xalqı arxasınca aparıb, ən taleyüklü məqamlarda qalib rolu oynayıblar. Azərbaycan xalqının ümummilli lideri Heydər Əliyev müasir dünya tarixinə parlaq və silinməz iz qoymuş böyük şəxsiyyət, qeyri-adi zəka, fitri istedad sahibi, müdrik dövlət xadimi kimi düşüb.

AZƏRTAC-ın bölgə müxbiri xəbər verir ki, bu fikirlər Ağcabədi Regional Mədəniyyət İdarəsi Ağdam Rayon Heydər Əliyev Mərkəzində ulu öndər Heydər Əliyevin vəfatının 18-ci ildönümü münasibətilə keçirilən "Müasir Azərbaycanın memarı və qurucusu" adlı anım tədbirində səsləndirilib. Heydər Əliyev Mərkəzinin əməkdaşlarının, yaq Qərvənd kənd tam orta məktəbinin müəllim və şagirdlərinin, Mədəniyyət evlərinin və klubların əməkdaşlarının iştirak etdiyi tədbirdə əvvəlcə ulu öndər Heydər Əliyevin və ölkəmizin ərazi bütövlüyü uğrunda şəhid olanların xatirələri bir dəqiqəlik sükutla yad edilib. Sonra Ulu Öndərə həsr olunmuş videorolik nümayiş etdirilib.

Ağdam Rayon Heydər Əliyev Mərkəzinin əməkdaşı Elçin Cəfərov, Zəngişalı Kənd Mədəniyyət evinin müdiri Fikrət Əliyev, Qaradağlı Kənd mədəniyyət evinin müdiri Zənurə Mirzəyeva, Üçoğlan Kənd Mədəniyyət evinin müdiri Sevda Cəfərova və başqaları çıxış edərək, xalqımızın böyük oğlu Heydər Əliyevin zəngin həyat və fəaliyyətindən, ölkəyə rəhbərlik etdiyi hər iki dövrdə gördüyü işlərdən, xalqımız qarşısında misilsiz xidmətlərindən danışıblar. Bildirilib ki, müstəsna xidmətləri ilə əbədilik qazanan ümummilli lider Heydər Əliyevin mənalı həyat yolu, zəngin və çoxşaxəli fəaliyyəti böyük bir məktəbdir. Ötən illərə nəzər salarkən Azərbaycan xalqının öz müdrik liderinin rəhbərliyi ilə qazanmış olduğu mühüm tarixi nailiyyətlərin bir daha şahidi oluruq. İntibah və milli şüurun oyanışı Heydər Əliyevin hakimiyyətə gəlişi ilə başlayıb, müstəqilliyimiz məhz onun sayəsində əbədi və dönməz xarakter alıb. Ölkəmiz dünyada layiq olduğu mərtəbəyə Ulu Öndərin uzaqgörənliyi, müdrikliyi, qətiyyəti, dəmir iradəsi, zəngin dövlətçilik təcrübəsi sayəsində yüksələ bilib.

Tədbirin sonunda məktəblilər ümummilli lider Heydər Əliyevə həsr olunmuş şeirlər söyləyiblər.