İlahiyyat İnstitutunda İctimai Nəzarət Şurasının fəaliyyət planı müzakirə edilib
Bakı, 28 dekabr, AZƏRTAC
Azərbaycan İlahiyyat İnstitutunda (Aİİ) İctimai Nəzarət Şurasının iclası keçirilib.
İnstitutdan AZƏRTAC-a bildirilib ki, rektor Ceyhun Məmmədov Aİİ-nin strukturu və inkişaf strategiyası, elm və tədris fəaliyyəti haqqında ətraflı məlumat verib, nəzərdə tutulan hədəflərə nail olmaq üçün şura tərəfindən dəyərli təkliflərin veriləcəyinə əminliyini bildirib.
Rektor bildirib ki, institutda imtahanlar bir qayda olaraq yazılı formada aparılır, zərurət yarandığı hallarda bəzi fənlər üzrə şifahi-dialoq və ya test formasında keçirilir.
İclasda şuranın fəaliyyət planı, qış imtahan sessiyası zamanı rektorun qəbul günlərində qurum üzvlərinin iştirakı, “açıq qapı” günlərinin təşkili, Azərbaycanın tanınmış ekspertləri, elm xadimləri, nüfuzlu KİV nümayəndələrinin iştirakı ilə sessiyanın monitorinqinin aparılması, üzvlərin müxtəlif vaxtlarda imtahan prosesini izləmələri üçün şəraitin yaradılması müzakirə olunub.
Sonda İctimai Nəzarət Şurasının fəaliyyətinin yüksək səviyyədə qurulması məqsədilə qurum üzvləri tərəfindən təkliflər verilib.
Qeyd edək ki, İctimai Nəzarət Şurasının əsas məqsədi Aİİ-nin fəaliyyətinə ictimai nəzarətin həyata keçirilməsi, universitet ilə ictimaiyyət arasında səmərəli qarşılıqlı əlaqələrin təşkili, aşkarlığın və şəffaflığın təmin olunması, əməkdaşların və təhsilalanların hüquqlarının müdafiəsi və fəaliyyətinin təkmilləşdirilməsi üçün təkliflərin verilməsindən ibarətdir.
Bölmənin digər xəbərləri
