İmtahan rəhbəri: 189-190 nömrəli məktəbdə təşkil olunan imtahanda 7 abituriyent iştirak etməyib
Bakı, 25 may, AZƏRTAC
Mayın 25-də Dövlət İmtahan Mərkəzi (DİM) tərəfindən II və III ixtisas qrupları üzrə ali təhsil müəssisələrinə qəbul imtahanı keçirilib.
DİM-in ümumi imtahan rəhbəri Samir Əhmədov AZƏRTAC-a müsahibəsində bildirib ki, 189-190 nömrəli tam orta məktəbdə təşkil olunan imtahanda 282 nəfər abituriyentdən 275 nəfəri iştirak edib. Onlardan 59 nəfəri oğlan, 216 nəfəri isə qız olub. Yeddi qız abituriyent imtahana qatılmayıb. İmtahanda ümumilikdə 3 imtahan rəhbəri və 25 nəzarətçi iştirak edib. İmtahanda heç bir qayda pozuntusu, insident qeydə alınmayıb. Sağlamlıq durumu ilə bağlı problem yaşayan abituriyent olmayıb.
Qeyd edək ki, II ixtisas qrupu üzrə imtahanda 25 min 961, III ixtisas qrupu üzrə imtahanda isə 28 min 286 nəfər olmaqla, ümumilikdə 54 min 247 abituriyentin iştirakı nəzərdə tutulurdu.
İmtahan keçirilən şəhər və rayonlarda ümumilikdə 213 imtahan binası, 4018 imtahan zalı ayrılıb. İmtahanların idarə olunmasına 213 ümumi imtahan rəhbəri, 635 imtahan rəhbəri, 5014 nəzarətçi, 717 buraxılış rejimi əməkdaşı, 213 bina nümayəndəsi cəlb olunub.
Bölmənin digər xəbərləri
