İNSANIN YERDƏNKƏNAR MƏNŞƏYİ SÜBUTA YETİRİLMİŞDİR
AZƏRTAC xəbər verir ki, Londonun İmperiya kollecinin əməkdaşları bildirirlər ki, Yer kürəsinə həyat kosmosdan “uçub gəlmişdir”.
Onların tədqiqatları göstərmişdir ki, DNT-nin tərkib hissələri yerdənkənar mənşəlidir. Alimlərin bu fikrə gəlməsinə 1969-cu ildə Yer kürəsinə düşmüş Marçıson meteoriti kömək etmişdir.
Məhz onun tərkibində gözlənilmədən insanın genetik kodunun komponentlərini aşkar etmişlər.
Doktor Zita Martins iddia edir ki, həyatın yaranması belə olmuşdur: 4 milyard il əvvəl Yer kürəsi meteorit bombardmanına məruz qalmışdır.
Kosmik cisimlər DNT-nin və ya zülalın əmələ gəlməsi üçün zəruri olan azotlu əsasları və molekulları gətirə bilərdi. Beləliklə, Yer kürəsi ilə toqquşduqda yerdənkənar elementlər təkamül prosesində xam material rolunda çıxış edə bilərdi.
Öz növbəsində, Vernadski adına Geokimya və Analitik Kimya İnstitutunun meteoritika laboratoriyasının müdiri Mixail Nazarov bildirmişdir ki, “bu hadisə də yoxlamağı tələb edir, çünki bu, həqiqətən, yer maddəsi ilə kontaminasiya ola bilər. Tədqiqat zamanı meteorit əllərimizdən keçir, əllərimiz isə yer mənşəli üzvi maddədir. Buna görə gözləmək lazımdır, hərçənd, şübhəsiz, maraqlı faktdır”.
Bölmənin digər xəbərləri
