Bakı, 24 yanvar, AZƏRTAC

Ulu öndər Heydər Əliyevin xeyir-duası ilə 25 il əvvəl cəbhəyə yola salınmış hərbi hissə bu gün də Vətən torpaqlarının keşiyində ayıq-sayıq dayanıb.

Müdafiə Nazirliyinin “N” saylı hərbi hissəsi 25 il öncə - 1994-cü il yanvarın 24-də xalqımızın ümummilli lideri, əbədiyaşar Ali Baş Komandan Heydər Əliyevin xeyir-duası ilə Pirəkəşkül təlim mərkəzindən birbaşa cəbhəyə yola salınıb. Füzuli, Cəbrayıl istiqamətlərində ilk uğurlu döyüş əməliyyatlarına qatılan hərbi hissə sonralar Murovdağ bölgəsində şaxtaya, çovğuna sinə gərərək düşmən hücumlarının dəf edilməsində, Vətən torpaqlarının müdafiəsində, eləcə də 1994-cü ilin oktyabrında dövlət çevrilişi cəhdlərinin qarşısının alınmasında xüsusilə fərqlənib, Ulu Öndərin etimadını şərəfli xidmətləri ilə doğruldub.

Hərbi hissənin ilk döyüşçülərindən olan Müdafiə Nazirliyinin zabiti, Əməkdar incəsənət xadimi, Prezidentin fərdi təqaüdçüsü, polkovnik Abdulla Qurbani ötən 25 illik tarixlə bağlı fikirlərini AZƏRTAC ilə bölüşüb.

Ulu Öndər Heydər Əliyevin Azərbaycan xalqı və dövləti qarşısında ən böyük xidmətlərindən biri də ölkəmizin müdafiə qüdrətinin daha da möhkəmlənməsinə, müasir mütəşəkkil Azərbaycan Ordusunun yaradılmasına bəxş etdiyi misilsiz töhfələrdir. Xalqımız haqlı olaraq, Ulu Öndəri həm də müasir Azərbaycan Ordusunun qurucusu, memarı kimi dəyərləndirir. Azərbaycan xalqı Heydər Əliyevin ordu quruculuğu siyasətinin bu gün Prezident, Silahlı Qüvvələrin Ali Baş Komandanı İlham Əliyev tərəfindən uğurla davam etdirilməsindən böyük qürur duyur. 

Heydər Əliyevin cəbhə bölgəsində, təlim meydanlarında, xüsusi təyinatlı təhsil müəssisələrində hərbi qulluqçularla çoxsaylı görüşləri heç vaxt unudulmur. Ulu Öndərin şəxsi heyət qarşısında etdiyi çıxışlar bu gün də aktualdır və hər birimizi işğal altındakı torpaqlarımızı azad edərək Azərbaycanın ərazi bütövlüyünü təmin etmək üçün mübarizəyə hazır olmağa çağırır. Yaxşı yadımdadır, 1994-cü il yanvarın 24-də Ali Baş Komandan Heydər Əliyev yeni yaranmış hərbi hissəni cəbhəyə yola salmaq üçün Pirəkəşkül təlim mərkəzinə gəlmişdi. Bu, o vaxtlar idi ki, hərb tariximizə “Horadiz əməliyyatı” kimi düşmüş uğurlu döyüşlərdən sonra düşmən yeni qüvvələrlə komplektləşdirilərək hücuma keçir, tərəfimizdən azad edilən 22 yaşayış məntəqəsini yenidən ələ keçirmək, verdikləri çoxlu itkilərin əvəzini çıxmaq istəyirdi. Cəbhədə döyüşlər səngimək bilmirdi. Düşmən bütün istiqamətlərdə fəallaşmışdı. Döyüşən hissələrə kömək üçün yeni qüvvələr göndərilməli idi. Zəngilandan çıxarılmış hərbi hissənin bazasında yaradılan və xüsusi təlim keçmiş qüvvələrlə komplektləşdirilən yeni hərbi hissə artıq yola düşməyə hazır idi. Yolasalma mərasimində Azərbaycan Prezidenti, Ali Baş Komandan Heydər Əliyevin şəxsən iştirak edəcəyi xəbəri hamıda böyük ruh yüksəkliyi yaratmışdı. Həmin gün xalqımızın dahi oğlu, yenilməz sərkərdəmiz Heydər Əliyev cəbhə bölgəsinə yola düşəcək Vətən oğullarına qələbə uğurları arzuladı, respublikamızın ərazi bütövlüyünü təmin etmək üçün son damla qanlarınadək vuruşacaqlarına and içən hərbi qulluqçulara xeyir-dua verərək dedi: “Mən sizə, əziz zabitlər, əsgərlər, məhz sizə arxalanıram, sizə güvənirəm. Əminəm ki, siz də, sizin kimi minlərlə Azərbaycan əsgəri, zabiti də bir nəfər tək ayağa qalxıb, Azərbaycanın ərazi bütövlüyünü müdafiə edəcəklər. İnanıram ki, siz gedib cəbhədəki qəhrəman döyüşçülərimizin sıralarına qoşulacaq, işğal olunmuş Azərbaycan torpaqlarının azad edilməsi üçün hünər, qəhrəmanlıq göstərəcəksiniz. Mən sizə uğurlar diləyirəm. Sizi xeyir-dua ilə yola salıram... Bilin ki, sizin hər birinizin arxanızda böyük Azərbaycan ölkəsi durmuşdur. Bilin ki, hər biriniz öz doğma Vətəninizi, öz ananızı, atanızı, bacınızı, qardaşınızı müdafiə etmək üçün ordu sıralarına gəlmisiniz və indi də cəbhəyə yola düşürsünüz. Bilin ki, sizin hər bir uğurlu addımınız Azərbaycan Respublikasının müstəqilliyinə və ərazi bütövlüyünə kömək edəcəkdir. Bilin ki, ümumi qələbəmiz sizin hər birinizin fəaliyyətindən, qəhrəmanlığından asılıdır...”

Hərbi hissənin şəxsi heyəti adından çıxış edən zabit Nizami Bayramov isə əminliklə bildirmişdi ki, Vətənin dar günündə silaha sarılmış biz Azərbaycan övladları işğal olunmuş torpaqlarımızı azad etməyincə geri dönməyəcəyik. Şəhid olmuş qardaş və bacılarımızın intiqamını almaq, torpaqlarımızı erməni işğalçılarının qanlı caynaqlarından qurtarmaq üçün cəbhəyə yola düşürük. Biz Prezidentimizə verdiyimiz sözə və şəhidlərimizin ruhuna içdiyimiz anda sadiq qalaraq, son damla qanımıza qədər vuruşacaq, təlim zamanı əldə etdiyimiz hərbi biliklərin sayəsində düşmənin murdar ayağını müqəddəs torpaqlarımızdan kəsəcək, qəsbkarların layiqli cəzasını verəcəyik.

Ümummilli Liderimizdən xeyir-dua alaraq cəbhəyə yola düşən hər bir əsgər və zabitimiz həm çətin, həm də şərəfli və müqəddəs bir tapşırığı yerinə yetirməli olduğunu yaxşı bilirdi. İlk döyüşlər Füzuli rayonunun Horadiz qəsəbəsi yaxınlığında oldu. Düşmən igid döyüşçülərimizin gücü qarşısında itkilərə məruz qaldı. Sıravi Hüseynov Aydın Zakir oğlu (Bakı) bir tankı, sıravi Kərimov Vüqar Muxtar oğlu isə (Kürdəmir) piyadaların döyüş maşınını məhv etdi. Əsgərlərdən Şəhniyar Məmmədov (Tovuz), Vüqar Nəsirov (Lerik), Valeh Paşayev (Bakı), Malik Gözəlov (Lənkəran), Şahin Quliyev (Balakən), Elşad Quliyev (Quba) və başqaları əsl qəhrəmanlıq nümunələri göstərdilər. Altı gün davam edən şiddətli döyüşlər zamanı Sakit Aslanov (Şəki), Kamal Səmədov (Şamaxı), Taleh Əliyev (Ağcabədi), Fariz Hüseynov (Neftçala), Qəzənfər Vəliyev (Zəngilan), Cümşüd Muradov (Zəngilan) Əbülfət Əlimirzəyev (Zəngilan) şəhidlik zirvəsinə ucaldılar. Lakin döyüşçülər ruhdan düşmədilər. Onlar yaxşı bilirdilər ki, qələbə qurbansız olmaz. 

Fevralın 11-də Füzuli strateji yolunun düşməndən təmizlənməsi və Mehdilər kəndindən keçib Lələtəpə yüksəkliyinin alınması, eləcə də Cocuq Mərcanlı kəndinin azad edilməsi uğrunda hücum əməliyyatlarında da Ulu Öndərin xeyir-duası ilə cəbhəyə yola salınmış hərbi hissənin döyüşçüləri fərqləndilər. Bu döyüşdə pulemyotçu əsgər Elnur Axundov düşmənin “Qaz-66” markalı iki avtomobilini və həmin avtomaşında olan 60-dan çox canlı qüvvəsini məhv etdi. Fevralın 15-də Cocuq Mərcanlı kəndi azad edildi. Canlı qüvvə və texnika sarıdan xeyli itki verən düşmən geri çəkilməyə məcbur oldu.

Murovdağ sınağı

Fevralın 24-də isə hərbi hissə Füzuli-Cəbrayıl istiqamətindən çıxarılaraq Murovdağa göndərildi. Murovdağda vəziyyət çox acınacaqlı idi. Müdafiə üçün heç bir sığınacaq hazırlanmamış, vacib olan bir çox mühəndis-istehkam qurğuları hələ də tikilib istifadəyə verilməmişdi və ərzaq-geyim təminatında bir çox nöqsanlar mövcud idi. Ordu quruculuğunda ciddi islahatların aparılmasına baxmayaraq, hələ də bir çox vəzifəli mülki məmurlar ordunun fəaliyyətinə müdaxilə edir və hətta dövlət çevrilişinə belə cəhd göstərirdilər. Buna baxmayaraq, hərbi hissəmizin şəxsi heyəti Murovdağın keşiyində ayıq-sayıq durmağı, düşmən təxribatlarının qarşısını almağı özlərinə şərəfli vəzifə bilir və andlarına sadiq qalmağa çalışırdılar.

Ömər və Güzgü zirvələri uğrunda döyüşlərdə şəxsi heyət əsl fədakarlıqlar göstərdi. Murovun sərt şaxtasına, düşmənin isə mövqelərimizi intensiv atəşə tutmasına rəğmən, Murovdağ igidləri postlarını tərk etmədilər. Onlar yaxşı bilirdilər ki, Gəncənin taleyi məhz Murovdağın etibarlı müdafiəsindən çox asılıdır. Mayor Telman Haqverdiyev, kapitan Cavad İsmayılov, kəşfiyyatçı əsgər Elgün İsmayılov, sıravi Mehman Hacıyev döyüşlərdə şəxsi rəşadət nümunələri göstərərək şəhid oldular. Zabit Əliyar Babakişiyev ağır yaralanmasına, əllərinin don vurmasına baxmayaraq, neçə-neçə yaralını döyüş meydanından çıxardı. Otuz dörd nəfər yaralı və don vurmuş hərbçimizi ölümün pəncəsindən xilas edən bölük komandirinin müavini, baş leytenant Yaşar Abdullayevin həyat yolu Murovdağın qarlı aşırımlarında başa çatdı. Yaşar Abdullayev alim idi. Onun 17 ixtirasından keçmiş Sovetlər İttifaqının hərbi aviasiyasında geniş istifadə olunurdu. Uzun müddət Rusiya və Azərbaycan Milli Elmlər akademiyalarının Foto-Elektronika İnstitutunda işləmişdi. Heydər Əliyevin xalqa müraciətindən sonra o da könüllü olaraq döyüşlərə yollanmışdı.

1994-cü ilin oktyabrında respublikada ictimai-siyasi vəziyyət gərginləşəndə ümummilli lider Heydər Əliyev milli televiziya və radio vasitəsilə orduya üz tutaraq, bu ağır saatlarda Azərbaycanın torpaqlarına təcavüzə yol verməməyə çağıranda Murovdağ döyüşçüləri də bir nəfər kimi ayaq üstə idilər. Onlar Ulu Öndərə ünvanladıqları teleqramda respublikamızın ərazi bütövlüyünə, müstəqilliyinə xəyanət edən qüvvələrə qarşı ayağa qalxdıqlarını və mübarizəyə hazır olduqlarını bəyan edirdilər. Həmin günlərdə dövlət çevrilişi cəhdlərinin qarşısının alınmasında fərqlənmiş bir neçə hərbi qulluqçumuz Azərbaycanın Milli Qəhrəmanı adına və orden-medallara layiq görüldü.

Azərbaycan əsgəri Heydər Əliyev ideyalarına həmişə sadiqdir

Ulu öndər Heydər Əliyevin xeyir-duası ilə 25 il öncə cəbhəyə yola salınan hərbi hissənin şəxsi heyəti bu gün də xidmət etdikləri birləşmənin keçdiyi döyüş yolu ilə fəxr edir və Azərbaycanın hərb tarixinə yeni-yeni parlaq səhifələr yazırlar. Əgər 25 il öncə bu hərbi hissədə əsgəri xidmət üçün heç bir şərait yox idisə, maddi-texniki təchizat yetərincə deyildisə, hərbi qulluqçuların sosial müdafiəsi istiqamətində heç bir təşəbbüs göstərilmirdisə, döyüşçülər ərzaq-geyimlə sınağa çəkilirdilərsə, peşəkarlıq aşağı səviyyədə idisə, fərarilik, cinayət baş alıb gedirdisə bu gün burada tamamilə başqa vəziyyət hökm sürür. Azərbaycan Ordusu, o cümlədən “Heydər Əliyevin xeyir-duası ilə cəbhəyə yola salınmış hərbi hissə” kimi tanınan birləşmə bu gün dövlət səviyyəsində hərtərəfli diqqət və qayğı ilə əhatə olunan, istənilən döyüş tapşırığını yerinə yetirməyə hər an hazır və qadir olan mütəşəkkil qüvvədir.

Mən əsgər kimi xidmətə başladığım bu hərbi hissədə tez-tez olur, şəxsi heyətlə görüşür, döyüş mövqelərinə qalxaraq onların xidmət şəraitləri ilə yaxından tanış oluram. Şəxsi heyətin döyüş və mənəvi-psixoloji hazırlığı yüksək səviyyədədir. Ən müasir silah-sursat, hərbi texnika və digər zəruri avadanlıqla təmin olunub. Geyim, ərzaq təminatı və digər sosial məsələlər tam həllini tapıb. Hərbi qulluqçuların ixtisas hazırlığı, peşəkarlıqlarının yüksəldilməsi diqqət mərkəzindədir. Hər bir hərbi qulluqçu böyük vətənpərvərlik hissi ilə yaşayır və torpaqlarımızın tezliklə azad olunacağına əmindirlər.

Şəhidlər unudulmur, onların xatirəsi əziz tutulur, döyüşlərdə sağlamlıqlarını itirənlər, müharibə iştirakçılarına hər cür qayğı göstərilir. Əsgər valideynləri və ictimaiyyət nümayəndələri ənənəvi “Açıq qapı günü” tədbirlərindən xoş təəssüratlarla ayrılırlar. Azərbaycan əsgəri Heydər Əliyevin ideyalarına həmişə sadiqdir və Ulu Öndərin ordu quruculuğu siyasətini uğurla davam etdirən Ali Baş Komandan İlham Əliyevin rəhbərliyi ilə Azərbaycan Ordusunun sıralarında Vətənə xidmətdən böyük qürur duyur.