İYUNUN 22-DƏ ALİ MƏKTƏBLƏRİN MAGİSTRATURA PİLLƏSİNƏ QƏBUL İMTAHANI KEÇİRİLƏCƏKDİR
AZƏRTAC xəbər verir ki, Tələbə Qəbulu üzrə Dövlət Komissiyası (TQDK) iyunun 22-də 2008-2009-cu tədris ili üçün Azərbaycan Respublikası ali məktəblərinin magistratura pilləsinə Bakı və Naxçıvan şəhərlərində qəbul imtahanı keçirəcəkdir.
TQDK-dan bildirmişlər ki, sənədlərin qəbulu internet vasitəsilə aparılmışdır. Bakalavrlar internet vasitəsilə “Elektron ərizəsi” doldurmuş və bu il iyunun 5-dən 14-dək TQDK tərəfindən yaradılmış Sənəd Qəbulu komissiyalarında təsdiq etdirmişlər.
Sənədlərin qəbulu haqqında elan, qəbul aparılan ixtisaslar, müsabiqə şərtləri “Magistr” jurnalının 2-ci nömrəsində dərc olunmuş, TQDK-nın internet səhifəsində yerləşdirilmiş və KİV-də işıqlandırılmışdır.
Bu il ali məktəblərin magistratura pilləsində təhsil almaq üçün nəzərdə tutulmuş 4 min 809 yerə 15 min 124 bakalavr sənəd vermişdir (ötən il 4 min 520 plan yerinə 12 min 478 ərizə verilmişdi).
İmtahanda bakalavrlara sualları cavablandırmaq üçün 2 saat 30 dəqiqə vaxt veriləcəkdir. Onlara məntiqi təfəkkürün yoxlanılması üzrə 50, xarici dil fənni üzrə 20, ixtisas üzrə 30 test tapşırığı təqdim olunacaqdır. Hər bir doğru cavab 1 balla, səhv cavablar isə 0 balla qiymətləndirilir.
Təhsili ödənişsiz və ödənişli əsaslarla olan ixtisaslar üzrə müsabiqəyə ümumi balı 50-dən az olmayan bakalavrlar buraxılırlar. Bu zaman bakalavrın məntiqi təfəkkür testindən topladığı bal 17-dən, ixtisas üzrə testdən (essedən, tərcümədən, suallara yazılı cavabdan) topladığı bal 10-dan, xarici dili bilmə səviyyəsinə dair testdən topladığı bal 7-dən (tədrisi ingilis dilində olan ixtisaslar üzrə müsabiqəyə buraxılmaq üçün ingilis dilindən topladığı bal 16-dan) az olmamalıdır.
Ümumi balı 65-dən çox olan bakalavrların müsabiqəyə buraxılması üçün məntiqi təfəkkür və xarici dil üzrə (tədrisi ingilis dilində olan ixtisaslar üzrə müsabiqə istisna olmaqla) toplanılan ballara qoyulan məhdudiyyətlər götürülür.
İmtahanın nəticələri www.tqdk.gov.az internet səhifəsində veriləcəkdir.
Bölmənin digər xəbərləri
