Kartofçuluqda müasir texnologiyanın tətbiqi yüksək nəticə verir
İsmayıllı, 3 aprel, AZƏRTAC
İsmayıllı rayonunun təbii-iqlim şəraiti, məhsuldar torpağı kartofçuluq üçün çox əlverişlidir. Təsadüfi deyil ki, rayonda ənənəvi sahə hesab edilən kartofçuluğa, onun inkişafına maraq ildən-ilə artır. Hər il 800-900 hektarda kartof əkilir. Adambaşına illik kartof istehlakının 75 kiloqram olduğu nəzərə alınsa, hazırda rayonun kartofa olan tələbatı 6500 tondur. Son beş ildə istehsal intensiv olaraq artır və ötən il 10415 tona çatıb. Halbuki, 2014-cü ildə istehsal 6576 ton olub. Artım heç də əkin sahəsinin genişləndirilməsi hesabına deyil. Belə ki, 2018-ci ildə kartof əkilən sahənin inişilkinə nisbətən 32 hektar az olmasına baxmayaraq, istehsal 72 ton çox olub. Bəs, rayonda son illər kartof istehsalında intensiv artıma necə nail olunur?
AZƏRTAC-ın bölgə müxbirinin sualını cavablandıran İsmayıllı Dövlət Aqrar İnkişaf Mərkəzinin aqronomu Paşa Məmmədov deyib: “İsmayıllıda son beş ildə müasir becərmə aqrotexnikasını özündə birləşdirən sənaye üsulu ilə kartof əkini həyata keçirilir. Bu, yüksək məhsuldarlığa, nəticədə istehsalda artıma səbəb olur”. Mütəxəssis vurğulayıb ki, sənaye üsulu ilə əkilən kartof sahələrində məhsuldarlıq hər hektardan orta hesabla 300-400 sentner təşkil edir. Bu, əl ilə əkindən 3-4 dəfə çoxdur.
Əkin prosesi müasir texnikalarla aparıldığı üçün toxumlar bərabər dərinlikdə basdırılır, toxumun üzərinə lazım olduğu qədər torpaq tökülür. Bu da onun yaxşı cücərməsinə imkan verir. Bu üsulla gün ərzində hektarlarla sahədə əkin aparmaq mümkündür.
Bölgədə müasir texnologiya ilə əkilən sahələrin ildən-ilə genişləndirildiyini deyən P.Məmmədov bildirib ki, ilk dəfə bu üsulla 2015-ci ildə 100 hektar sahədə əkin aparılıb. 2018-ci ildə sahələr 200 hektara çatdırılıb. Bu il isə “İsmayıllı tərəvəz” və “Aqro-master” MMC tərəfindən 219 hektarda kartof əkini nəzərdə tutulub və hələlik 200 hektarda əkin sənaye üsulu ilə aparılıb.
Mütəxəssis qeyd edib ki, kartof əkinində, çıxarılmasında və suvarılmasında istifadə olunan texnika və aqreqatlar Almaniyadan gətirilib. Toxum seçimindən başqa bütün proseslər mexanikləşdirilib. Suvarma aqreqatı da Almaniyaya məxsusdur. Əkin yerləri hər il dəyişdirildiyi üçün bu aqrotexniki tədbir yağış yağdırma üsulu ilə aparılır.
Yüksək məhsul üçün məhsuldar sortlardan istifadənin vacibliyini vurğulayan mütəxəssis qeyd edib ki, toxuma artan tələbat nəzərə alınaraq “İsmayıllı tərəvəz” MMC-nin nəzdində kartof toxumçuluğu təsərrüfatı yaradılıb.
Bölmənin digər xəbərləri
