KAZANDA HÖKUMƏTLƏRARASI BİRGƏ KOMİSSİYANIN İKİNCİ İCLASI OLMUŞDUR
AZƏRTAC-ın xüsusi müxbiri xəbər verir ki, iyunun 17-də Baş nazir Artur Rasizadənin Tatarıstana səfəri çərçivəsində Kazan şəhərində Azərbaycan Respublikası ilə Tatarıstan Respublikası arasında iqtisadi-ticarət, elmi-texniki və mədəni əməkdaşlıq üzrə hökumətlərarası birgə komissiyanın ikinci iclası olmuşdur.
Tatarıstan Baş nazirinin müavini - mədəniyyət naziri Zilya Valeyeva iclası açaraq, respublikalarımız arasındakı iqtisadi-ticarət əlaqələrinin inkişaf dinamikasından danışmış, ticarət dövriyyəsinin nəzərəçarpacaq dərəcədə artdığını bildirmişdir. O demişdir ki, birgə komissiyanın birinci iclasından sonra Azərbaycanın və Tatarıstanın ayrı-ayrı təsərrüfat subyektləri, şirkətləri arasında birbaşa əlaqələr yaradılmış, 2007-ci ildə ticarət dövriyyəsinin həcmi 66 milyon ABŞ dollarına çatmışdır. Cari ilin birinci yarısında ticarət dövriyyəsi 2007-ci ilin müvafiq dövrü ilə müqayisədə 45 faiz artmışdır. Azərbaycandan idxal edilən məhsulların həcmi də artmış, 6 ayda Azərbaycandan Tatarıstana 2,5 milyon dollarlıq məhsul gətirilmişdir.
Azərbaycan Respublikası tərəfdən komissiyanın həmsədri, Baş nazirin birinci müavini Yaqub Eyyubov nümayəndə heyətinə göstərilən qonaqpərvərliyə görə minnətdarlığını bildirmiş və demişdir ki, dövlətimizin başçısı İlham Əliyevin Sərəncamı ilə 2007-ci ilin noyabrında komissiyanın Azərbaycan tərəfdən tərkibi yeniləşmişdir.
Y.Eyyubov bildirmişdir ki, bu gün Azərbaycan ilə Tatarıstan arasında iqtisadi-ticarət dövriyyəsinin artırılması üçün geniş imkanlar vardır. Azərbaycan Respublikasının Baş naziri Artur Rasizadənin rəhbərlik etdiyi nümayəndə heyətinin Tatarıstana bu səfəri əlaqələrimizin inkişafında yeni mərhələ açacaq, əməkdaşlığımız bütün sahələri əhatə edəcəkdir.
Sonra komissiyanın iclasında iqtisadi-ticarət, elmi-texniki, mədəni və digər sahələr üzrə əməkdaşlığın genişləndirilməsinə dair müvafiq vəzifələr müzakirə olunmuş, hər iki tərəfin iş adamları üçün tövsiyələr hazırlamışdır.
İclasın sonunda protokollar imzalanmış, komissiyanın növbəti iclasının 2009-cu ildə Bakıda keçirilməsi qərara alınmışdır.
Bölmənin digər xəbərləri
