MƏDƏNİYYƏT
“Kəlbəcər harayı” qəzetinin nəşrə başlamasından 78 il ötür
Bakı, 25 fevral (AZƏRTAC). Bu gün yurdumuzun dilbər guşələrindən olan Kəlbəcər rayonunun bütün sakinləri kimi, “Kəlbəcər harayı” qəzeti də məcburi köçkün həyatı yaşayır. Qəzetin ilk nömrəsinin çapdan çıxmasından 78 il keçir. Fəaliyyət göstərdiyi 78 il ərzində müxtəlif adlar altında nəşr edilən qəzet Kəlbəcər rayonunun ictimai-siyasi, iqtisadi-sosial və mədəni həyatının güzgüsü olmuşdur.
“Kəlbəcər harayı” qəzetinin baş redaktoru Zahid Muxtar AZƏRTAC-a demişdir:
- Bu gün məcburi köçkün həyatı yaşasaq da ölkəmizdəki gündən-günə sürətlənən qlobal inkişafa seyrçi kimi baxmırıq. Rayonumuzun əhalisi iqtisadiyyat, mədəniyyət, idman və təhsil və digər sahələrdə ildən-ilə böyük uğurlar əldə etməyə çalışırlar. Rayonumuzun fəaliyyətdə olan idarə və müəssisələri yüksək məsuliyyət hissi ilə çalışaraq qarşıya qoyulan vəzifələrə əsasən nail ola bilirlər. Şübhəsiz, bu uğurlarda Azərbaycan dövlətinin və onun başçısının biz məcburi köçkünlərə göstərdikləri diqqət və qayğı mühüm rol oynayır. Prezident İlham Əliyevin kəlbəcərlilərlə mütəmadi görüşləri hər birimizdə ruh yüksəkliyi yaradır.
Həyata keçirilən məqsədyönlü tədbirlər təbii ki, rayonumuzun həyatının güzgüsü olan “Kəlbəcər harayı” qəzetinin də işinə öz müsbət təsirini göstərir. Birincisi, mövzu qıtlığımız olmur, ikincisi, ən əsası isə biz də işimizi tələb olunan səviyyədə qurmağa çalışırıq.
Bu gün məcburi köçkünlük həyatı yaşayan rayonumuzun Ermənistanın silahlı qüvvələri tərəfindən işğalı nəticəsində düşdüyü ağır situasiyaya uyğun olaraq “Kəlbəcər harayı” adı altında nəşr olunan qəzetimiz 1934-cü ilin fevralında “Qızıl maldar” adı ilə həyata vəsiqə almışdır. Sonralar isə “Yeni həyat uğrunda”, “Yenilik” adları ilə öz fəaliyyətini davam etdirmişdir. Kəlbəcər işğaladək Azərbaycanın ucqar dağ rayonu olsa da, qəzet özünün operativ və obyektiv fəaliyyəti ilə buradakı qaynar həyata sözün əsl mənasında işıq sala bilmişdir.
Ayrı-ayrı dövrlərdə bu qəzetə Zal Cabbarlı, Kərəm Əhmədov, Məhəmmədəli İsmayılov, Sədnik Paşayev, Şamil Əsgərov, Əli Mirzəyev, Bəhmən Məmmədov, Əli Qurbanov, Zimistan Həsənov kimi tanınmış el ziyalıları rəhbərlik edərək onun geniş oxucu auditoriyasında rəğbət qazanmasına nail olmuşlar. Məmməd Aslan, Amil Novruzov, Məhəmməd Nərimanoğlu, Hidayət Elvüsal kimi respublika miqyasında tanınmış qələm sahibləri də məhz bu qəzetdə püxtələşmişlər.
1993-cü ilin yazında Kəlbəcərə qara yellər əsdi. Elimiz-obamız yerindən-yurdundan didərgin düşdü. Sındıq, lakin əyilmədik. Özümüzdə güc tapdıq. Qəzetin əməkdaşları mərhum redaktorumuz Zimistan Həsənovun ətrafında toplaşaraq Gəncə şəhərində “Kəlbəcər harayı” kimi ağrılı-acılı bir adla qəzetimizi yaşatdı.
Yeri gəlmişkən, onu da qeyd edim ki, təsərrüfat hesabı ilə maliyyələşən bu mətbu orqanın əvvəllər ildə vur-tut 2 nömrəsi işıq üzü görürdü. Vidadi Məhərrəmov Kəlbəcər Rayon İcra Hakimiyyətinin başçısı təyin olunduqdan sonra redaksiyaya doğma münasibət göstərilir. Bu diqqət və qayğının nəticəsidir ki, 2009-cu ildə qəzetimiz 48 nömrə, 2010-cu ildə 49 nömrə, 2011-ci ildə isə 50 nömrə ilə, 4000 tirajla oxucularının görüşünə gəlmişdir. Bu da bölgə qəzetləri arasında ilk yerlərdən biridir.
Qəzetimizdə dərc olunan yazılar da öz mövzu rəngarəngliyinə görə diqqəti cəlb edir. Şübhəsiz, respublikamızda gedən irimiqyaslı quruculuq işləri, sosial, iqtisadi və siyasi uğurlar qəzetimizin baş mövzusudur. Bunlarla yanaşı, ayrı-ayrı bölgələrdə məskunlaşmış həmyerlilərimizlə rayon rəhbərliyinin görüşləri, Böyük Vətən müharibəsi iştirakçılarına, Qarabağ müharibəsi əlillərinə, şəhid ailələrinə göstərilən diqqət və qayğı, rayonumuzda aparılan digər tədbirlər, həmçinin gənclərimizin idman, incəsənət, təhsil sahəsində qazandıqları sevindirici nəticələr, Kəlbəcərin tarixinə, coğrafi mövqeyinə aid müxtəlif elm adamlarının maraqlı araşdırmaları, torpaqlarımızın müdafiəsi uğrunda fəda olmuş şəhidlərimizin şücaəti qəzetimizin səhifələrində öz əksini tapmaqdadır.
Hazırda kollektivimizdə çalışanlardan 7 nəfəri Mətbuat Şurasının və Azərbaycan Jurnalistlər Birliyinin üzvüdür.
Qəzet yaşayırsa, deməli, həyat davam edir. Həyat davam etməlidir ki, düşmən mübarizəmizi, intiqamımızı görsün. Bu gün ölkəmizdə güclü, müdrik siyasət yürüdülür. Bizim haqq işimiz dünyaya bəyan edilir. Doğma od-ocağımıza qayıdacağımız günün yaxında olmasına inanırıq. 79 yaşına – ahıllıq, müdriklik çağına qədəm qoyan qəzetimizin növbəti ildönümləri, yubileyləri dağlar diyarı Kəlbəcərdə qeyd olunacaqdır. Kəlbəcər həsrətindən yox, yaşayıb-yaratmaq əzmi həmişə yüksək olan yurddaşlarımızın qurub-yaratmaq əzmindən, qələbə müjdəsindən yazacağıq. O gün uzaqda deyil. Biz buna qəti əminik.