KƏND TƏSƏRRÜFATI NAZİRLİYİ NÜMAYƏNDƏ HEYƏTİNİN İRANA SƏFƏRİ BAŞA ÇATMIŞDIR
AZƏRTAC-ın xüsusi müxbir xəbər verir ki, İran İslam Respublikasının kənd təsərrüfatı naziri Məhəmməd Rza İskəndərinin dəvəti ilə Azərbaycan Respublikasının kənd təsərrüfatı naziri İsmət Abasovun rəhbərlik etdiyi nümayəndə heyətinin İrana səfəri başa çatmışdır.
Səfər Azərbaycanın İrandakı səfirliyində ümummilli lider Heydər Əliyevin büstü önünə əklil qoymaqla başlamışdır. Sonra Heydər Əliyev guşəsi ilə tanışlıq olmuşdur.
İranın birinci vitse-prezidenti Pərviz Davudi, kənd təsərrüfatı naziri Məhəmməd Rza İskəndəri və İqtisadi Əməkdaşlıq Təşkilatının baş katibi Xurşid Ənvərlə keçirilən görüşlərdə İ.Abasov ulu öndər Heydər Əliyevin rəhbərliyi ilə Azərbaycanda həyata keçirilən aqrar islahatlar nəticəsində əldə olunan uğur və nailiyyətlər barədə məlumat verərək bildirmişdir ki, Prezident İlham Əliyev bu sahənin inkişafına xüsusi diqqət göstərir. Azərbaycanda ərzaq təhlükəsizliyinin təmin edilməsi üçün ölkəmizin bütün imkanlarından istifadə edilir.
Görüşlərdə aqrar sahənin inkişaf etdirilməsi üçün imkanlardan qarşılıqlı istifadə edilməsinə dair fikir mübadiləsi aparılmışdır. Qeyd olunmuşdur ki, bunun üçün kifayət qədər potensial mövcuddur.
Sonra qonaqlar Tehran yaxınlığında - Kərəc şəhərində quşçuluq və heyvandarlıq sahələri üçün dərman istehsal edən elmi-tədqiqat və bio-texnologi müəssisələrlə, İranın Milli Botanika Bağı, elmi-tədris mərkəzləri və digər obyektlərlə tanış olmuşlar. Nümayəndə heyətinin tərkibindəki mütəxəssislər qrupu Ərdəbil vilayətindəki kənd təsərrüfatı sahələrinə, istehsalat komplekslərinə baş çəkmişdir.
Səfər çərçivəsində aparılan danışıqların nəticəsi olaraq sonda kənd təsərrüfatı nazirləri iki ölkə arasında kənd təsərrüfatı sahəsində əməkdaşlığa dair protokol imzalamışlar.
Nümayəndə heyətini Azərbaycan Respublikasının İran İslam Respublikasındakı səfiri Abbasəli Həsənov müşayiət etmişdir.
######
Bölmənin digər xəbərləri
