KÜRDƏMİRDƏ BU İL 60 MİN TONDAN ÇOX TAXIL İSTEHSALI GÖZLƏNİLİR
Kürdəmir Rayon İcra Hakimiyyətinin aqrar şöbəsindən AZƏRTAC-a verilən məlumatda göstərilir ki, taxılçılıqla məşğul olan fermerlər cari ildə 28 min 537 hektar sahədə məhsul yetişdirmişlər. Bu, ötən ildəkindən 541 hektar çoxdur.
Biçin kampaniyasına ciddi hazırlıqla başlayan taxılçılar qısa vaxtda 22,2 min hektarda məhsul yığımını başa çatdırmışlar. Hər hektardan məhsuldarlıq hələlik 22 sentner təşkil edir. Bir sıra ərazilərdə, xüsusilə ənənəvi taxılçılıq təsərrüfatlarında məhsuldarlıq 25-27 sentnerdir. Bu təsərrüfatlardan ümumilikdə orta hesabla 4,5-5 min ton toxum istehsalı gözlənilir ki, bu da rayonda toxuma olan ehtiyacın 15-20 faizi qədərdir. Təkcə “Vüqar” fermer təsərrüfatı 1.470 hektarda toxum yetişdirmişdir. Bunun 50 hektarı “Qılçıqsız” elit buğda sortudur.
Hazırda zəmilərdə 80 kombayn, 100-dən çox yük avtomobili və yedəkli traktor işləyir. Kombaynlardan 20-si kömək üçün dağlıq rayonlardan gətirilmişdir.
Taxılçılar biçin kampaniyasını on günə başa çatdırmaq əzmindədirlər. Mütəxəssislərin qənaətinə görə, cari mövsümdə Kürdəmirdə ötən ildəkindən azı 2 min ton çox, yəni 60 min tondan artıq məhsul istehsalı gözlənilir.
Bölmənin digər xəbərləri
