Latviyada “Eurovision-2014” mahnı müsabiqəsinin milli seçimləri başlanmışdır
Bakı, 9 yanvar (AZƏRTAC). Bu ilin mayında Danimarkanın Kopenhagen şəhərində keçiriləcək “Eurovision-2014” mahnı müsabiqəsində çıxış edəcək Latviya təmsilçisinin müəyyənləşdirilməsi üçün milli seçimlərə başlanılmışdır.
AZƏRTAC “Eurovision” mahnı müsabiqəsinin rəsmi saytına istinadla xəbər verir ki, ötən ilin sonunda Latviya Yayım Şurasının seçdiyi 24 mahnı fevralın 1-2-də müvafiq olaraq keçiriləcək milli seçim turunun birinci və ikinci yarımfinallarında ifa olunacaqdır. Hər yarımfinaldan 6 mahnı seçilərək fevralın 22-də keçiriləcək final mərhələsinə təqdim ediləcəkdir.
Latviya milli seçim turunun yarımfinalları Riqada, final mərhələsi Ventspilsdə baş tutacaqdır.
“Bizə qoşulun!” şüarı altında keçiriləcək “Eurovision-2014” mahnı müsabiqəsinin birinci və ikinci yarımfinalları müvafiq olaraq mayın 6-sı və 8-də, final mərhələsi isə mayın 10-da olacaqdır.
Bölmənin digər xəbərləri
