LAYİHƏ ÜZƏRİNDƏ İŞ DAVAM ETDİRİLƏCƏK
İyunun 10-11-də MDB-nin Minskdəki iqamətgahında Müstəqil Dövlətlər Birliyi ərazisində qanunsuz odlu silah, hərbi sursat, partlayıcı maddə və partladıcı qurğu hazırlanmasına və dövriyyəsinə qarşı mübarizə sahəsində əməkdaşlıq haqqında saziş layihəsinin razılaşdırılması üzrə ekspert qrupunun ikinci iclası keçiriləcəkdir.
MDB İcrayyə Komitəsinin mətbuat xidmətindən AZƏRTAC-a bildirmişlər ki, saziş layihəsi qanunsuz silah hazırlanması və dövriyyəsi ilə bağlı cinayətlərin qabaqlanması və üstünün açılması, yaranmış vəziyyətin təhlili, razılaşdırılmış strategiyanın və birgə mübarizə tədbirlərinin hazırlanması, səlahiyyətli orqanların qarşılıqlı fəaliyyət mexanizmlərinin əlaqələndirilməsi və təkmilləşdirilməsi sahəsində əməkdaşlığı nəzərdə tutur. Qanunsuz silah dövriyyəsinə aidiyyəti olan transmilli cinayətkar qruplar, onların liderləri və iştirakçıları haqqında birgə məlumat bankı yaratrmaq da planlaşdırılır. MDB-nin bütün ölkələrindən cinayətkar qruplar haqqında məlumatın daxil olacağı bankdan hər bir dövlətin hüquq mühafizə orqanları istifadə edə biləcəklər.
Layihə tam razılaşdırıldıqdan sonra nəzərdən keçirilmək üçün Birlik ölkələrinin hökumət başçılarına təqdim ediləcəkdir.
Xatırladaq ki, 2007-ci ildə MDB ərazisində silah, onun əsas hissələri, döyüş sursatı, partlayıcı maddə və partladıcı qurğuların qanunsuz dövriyyəsi ilə bağlı 46 mindən çox cinayət hadisəsi qeydə alınmışdır. Bundan əlavə, odlu silah və qaz silahı, döyüş sursatı, partlayıcı maddə və partladıcı qurğularla 8,6 mindən yuxarı cinayət hadisəsi törədilmişdir.
Bölmənin digər xəbərləri
