CƏMİYYƏT
“Lənkəran” qəzetinin 80 yaşı tamam olmuşdur
Lənkəran, 24 yanvar (AZƏRTAC). Cənub bölgəsində yeni, peşəkar, obyektiv, yüksək milli şüur və vətənpərvərlik prinsiplərinə dönmədən əməl edən, yeni nəsil jurnalistlərin yetişməsində, xalqın maariflənməsində, habelə milli və bəşəri dəyərlərin təbliğındə mühüm rol oynayan “Lənkəran” qəzetinin 80 yaşı tamam olmuşdur.
AZƏRTAC xəbər verir ki, 1931-ci il yanvarın 21-də “Qızıl Talış” adı ilə işıq üzü görən qəzet azərbaycan və talış dillərində nəşr olunmuşdur. Sonralar qəzet “Sıə Tolış”, “Sosialist subtropikası”, “Leninçi” adları ilə çıxmış, öz səhifələrində cəmiyyəti düşündürən problemləri, dövrün qabaqcıl ideyalarını və mütərəqqi fikirlərini əks etdirmişdir. Ötən əsrin 60-cı illərində Lənkəran şəhərində nəşr olunan “Leninçi” qəzeti regional qəzetə çevrilmişdir. Yüksək poliqrafik səviyyədə buraxılan qəzetdə təkcə Lənkəran raonundan deyil, qonşu Astara, Lerik, Masallı və Yardımlı rayonlarının da ictimai-siyasi və mədəni həyatı, sakinləri düşündürən problemlər barədə maraqlı yazılar dərc edilmişdir.
İyirminci əsrin sonlarında yenidən özünün müstəqilliyinə qovuşan Azərbaycanda söz və mətbuat azadlığının təmin edilməsi KİV-lərin sərbəst fəaliyyət göstərməsi, o cümlədən “Lənkəran” qəzetinin nəşri üçün də geniş imkanlar açmışdır.
Hazırda “Lənkəran” qəzeti ayda iki dəfə yüksək poliqrafik səviyyədə 3 min nüsxədən yuxarı tirajla nəşr olunur. Qəzetin redaksiyası ən zəruri texniki avadanlıqla təmin edilmişdir.