LONDONDA AZƏRBAYCANA HƏSR OLUNMUŞ BEYNƏLXALQ KONFRANS KEÇİRİLƏCƏKDİR
Azərbaycan Respublikasının Prezidenti yanında Strateji Araşdırmalar Mərkəzindən AZƏRTAC-a bildirmişlər ki, iyunun 20-də Londonda “Azərbaycanın tərəqqiyə aparan yolu: iqtisadi, siyasi və xarici siyasət çağırışları” mövzusunda beynəlxalq konfrans keçiriləcəkdir.
Konfransın təşkilatçıları Azərbaycan Respublikasının Prezidenti yanında Strateji Araşdırmalar Mərkəzi, Böyük Britaniyanın Strateji Araşdırmalar üzrə Beynəlxalq İnstitutu (İİSS), Münaqişələr və Dövlət Quruculuğu üzrə London İnformasiya Şəbəkəsidir (LİNKS).
Tədbirdə ölkəmizi Prezidentin İcra Aparatının siyasi təhlil və informasiya təminatı şöbəsinin müdiri, siyasi elmlər namizədi Elnur Aslanov, Azərbaycan Prezidenti yanında Strateji Araşdırmalar Mərkəzinin direktoru, siyasi elmlər doktoru Elxan Nuriyev, ölkəmizin Böyük Britaniyadakı səfiri Fəxrəddin Qurbanov, Milli Məclisin İqtisadi siyasət daimi komissiyası sədrinin müavini Azər Əmiraslanov, Dövlət Neft Fondunun icraçı direktoru Şahmar Mövsümov və qeyri-hökumət təşkilatlarının nümayəndələri təmsil edəcəklər.
Konfransa ATƏT-in Bakı ofisinin rəhbəri, səfir Xose Luis Herrero Ansola, İİSS-in baş direktoru Con Çipmən, LİNKS-in icraçı direktoru Dennis Sammut, EİU İqtisadi Təhqiqat Mərkəzi, London İqtisadiyyat Məktəbi, NATO Parlament Assambleyası və digər beynəlxalq qurumların, biznes, maliyyə-bank təşkilatlarının, Böyük Britaniya hökumətinin nümayəndələri, nüfuzlu ekspert və politoloqlar da qatılacaqlar.
“Azərbaycan əsas enerji hasilatçısı və mühüm enerji nəqli ölkəsi kimi: əhəmiyyəti, potensialı və təhlükələr”, “Davamlı iqtisadi islahatlar, diversifikasiya və davamlı inkişaf: qeyri-neft və qaz sektorunda Azərbaycanın iqtisadi potensialının realizə olunması”, “Modern dövlət quruculuğu: Azərbaycanın dövlət idarəçiliyi və demokratik təsisatların qurulması sahəsində çağırışları”, “Azərbaycanın xarici siyasətinin əsas prioritetləri: Qarabağ münaqişəsi və digər məsələlər” mövzuları üzrə keçiriləcək 4 sessiyada məruzələr dinləniləcək, fikir mübadiləsi, işgüzar müzakirələr aparılacaqdır.
Azərbaycanın Böyük Britaniyadakı səfirliyində konfrans iştirakçıları üçün qəbul təşkil olunacaqdır.
Bölmənin digər xəbərləri
