Mart ayı üzrə bank sektorunun icmal göstəriciləri açıqlanıb
Bakı, 8 may, AZƏRTAC
Martın 31-nə Azərbaycanda fəaliyyət göstərən bankların cəmi aktivləri 29 milyard 846,9 milyon manat, cəmi öhdəlikləri isə 25 milyard 533,2 milyon manat, sektorun balans kapitalı 4 milyard 313,7 milyon manat olub.
Maliyyə Bazarlarına Nəzarət Palatasından (MBNP) AZƏRTAC-a bildirilib ki, mart ayına sektorun aktivlərinin 42,6 faizini kredit portfeli təşkil edib. Ay ərzində kredit portfeli 0,7 faiz (84,5 milyon manat) artaraq 12 milyard 714,4 milyon manat olub.
Kredit portfeli cari ilin ilk rübündə 0,7 faiz (86,1 milyon manat) artıb. Artım milli valyutada kreditlər üzrə olub. Belə ki, ay ərzində milli valyutada kreditlər 1,2 faiz (93,2 milyon manat), rüb ərzində isə 2,7 faiz (211,2 milyon manat) artaraq 7 milyard 983 milyon manata çatıb.
Martda fiziki şəxslərin əmanətləri 8 milyard 253,5 milyon manat təşkil edib. Ay ərzində əmanətlər 1,7 faiz (135 milyon manat) artıb. Həmin ay fiziki şəxslərin depozit portfelinin artımı müddətli əmanətlər hesabına olub. Martda fiziki şəxslərin müddətli əmanətləri 2,5 faiz (135,8 milyon manat) artaraq 5 milyard 465,8 milyon manat təşkil edib.
Hüquqi şəxslərin depoziti cari ilin ilk rübündə 0,1 faiz (7 milyon manat) artaraq 10 milyard 318,5 milyon manata çatıb. Artım müddətli depozitlər hesabınadır. Belə ki, dövr ərzində hüquqi şəxslərin müddətli depozitləri 19,2 faiz (278,1 milyon manat) artıb.
Sektorun balans kapitalı mart ayında 1,7 faiz (70,9 milyon manat) artaraq 4 milyard 313,7 milyon manata çatıb. Bu göstərici cari ilin ilk rübündə 5,9 faiz (241,9 milyon manat) artıb.
Martda bankların əməliyyat mənfəəti 179,1 milyon manat, xalis mənfəəti isə 123,9 milyon manat təşkil edib. Ötən ilin müvafiq dövrü ilə müqayisədə faiz gəlirləri 12,9 faiz, kreditlər üzrə faiz gəlirləri 19,5 faiz çoxalıb.
Fəaliyyət göstərən 30 bankın filiallarının sayı 512, şöbələrinin sayı 129, ATM-lərin sayı 2 min 535 olub. Bank sektorunun işçi heyətinin sayında artım martda da davam edib. Belə ki, martda işçi sayı 0,4 faiz (66 nəfər) artaraq 17 min 749 nəfər təşkil edib.
Bölmənin digər xəbərləri
