Martın ilk hərracında özəlləşməyə 82 dövlət əmlakı çıxarılıb
Bakı, 4 fevral, AZƏRTAC
Martın 5-də Əmlak Məsələləri Dövlət Komitəsinin (ƏMDK) keçirəcəyi özəlləşdirilmə hərracına ümumilikdə 82 dövlət əmlakı çıxarılıb. Dövlət əmlaklarından 36-sı kiçik dövlət müəssisə və obyekti, 23-ü səhmdar cəmiyyəti, 7-si qeyri-yaşayış sahəsi, 4-ü yarımçıq tikili, 12-si isə nəqliyyat vasitəsidir.
Komitədən AZƏRTAC-a bildirilib ki, ƏMDK tərəfindən keçirilən hərraclar özəl sektorun inkişafını stimullaşdırır. Özəlləşdirilən dövlət əmlaklarının müasir formada yenidən qurulması ilə daxili istehsal artır, regionlar üzrə sahibkarlıq fəaliyyəti genişlənir. Belə müəssisələrin uğurlu fəaliyyəti digər investorları özəlləşdirmə prosesində iştiraka həvəsləndirir.
Budəfəki hərracda özəlləşməyə çıxarılan kiçik dövlət obyektlərinə Şəmkirdə balıq zavodu, Şabran və Balakəndə mehmanxanalar, digər şəhər və rayonlarda mağaza, yeməkxana, şadlıq evləri və kinoteatr kimi müəssisələr aiddir. Hərraca çıxarılan kiçik dövlət müəssisələrinin ümumi faydalı sahəsi 7,5 kvadratmetr ilə 9 min 297 kvadratmetr arasındadır. Saatlıda yerləşən bu növ dövlət əmlaklarının isə ümumi faydalı sahəsi 420 kvadratmetrə qədərdir. Təmir-tikinti sahəsinə aid olan bu müəssisələri investorlar torpaq sahəsi ilə birgə özəlləşdirə bilər. Şabran şəhəri, M.Ə.Rəsulzadə küçəsindəki “Dəvəçi” Mehmanxanası da sərmayəçi üçün maraqlı ola biləcək dövlət əmlaklarındandır. Turizm sektorunda gəlirli fəaliyyət potensialı olan obyektin ümumi faydalı sahəsi 582,5 kvadratmetr, torpaq sahəsi isə 1583,5 kvadratmetrdir. Biznes fəaliyyətinə yeni başlayanlar üçün maraqlı ola biləcək qeyri-yaşayış sahələrindən 2-si paytaxtda, digərləri Samux, Gəncə və Sabirabadda yerləşir. Hərraca çıxarılan bu növ dövlət əmlakları arasında ən yüksək - 266,7 kvadratmetr ümumi faydalı sahəsi olan obyekt paytaxtın Nərimanov rayonu, F.Yusifov küçəsindədir. Ticarət, iaşə və xidmət fəaliyyəti üçün uyğun olan digər qeyri-yaşayış sahələrinin ümumi faydalı sahəsi 22,2 kvadratmetr ilə 176,7 kvadratmetr arasındadır.
Dövlətə məxsus səhm paketlərinin özəlləşməyə çıxarıldığı səhmdar cəmiyyətləri kəndkimya, nəqliyyat, inşaat, təmir və digər sahələrə aiddir. Hərraca 30-45 faizlik səhm paketləri çıxarılan əmlaklara “Ağcabədi Aqrotexservis”, “Sabirabad Mexanikləşdirmə”, “Yevlax taxılçı”, “Zabrat Tikinti Quraşdırma” və digər bu kimi səhmdar cəmiyyətləri aiddir.
Hərraca çıxarılan avtomobillər “Volkswagen”, “Toyota”, “Chevrolet” və “Nissan” markalarına aiddir. Bu nəqliyyat vasitələrinin buraxılış tarixləri 2006-2010-cu illərdir. Bu əmlaklar üzrə təyin olunmuş ilkin hərrac qiyməti 4 min manat ilə 8 min manat arasındadır.
Əmlak Məsələləri Dövlət Komitəsinin rəsmi saytı (emdk.gov.az) və Özəlləşdirmə portalında (privatization.az) hər bir dövlət əmlakı haqqında ətraflı məlumat yerləşdirilir. Vətəndaş seçdiyi dövlət əmlakını elektron formada sifariş verməklə hərracda canlı və onlayn formada iştirak edə bilər.
Bölmənin digər xəbərləri
