Məktəblilər radiasiyanın bioloji obyektlərə təsirləri barədə məlumatlandırılıb
Bakı, 18 aprel, AZƏRTAC
Azərbaycan Milli Elmlər Akademiyasının (AMEA) Radiasiya Problemləri İnstitutunda (RPİ) Bakı şəhərinin Nəsimi rayonunda yerləşən 211 nömrəli tam orta məktəbin VII və IX sinif şagirdləri üçün seminar keçirilib.
AMEA-dan AZƏRTAC-a bildiriblər ki, seminarda institutun elmi işlər üzrə direktor müavini, dosent Rəvan Mehdiyeva bu elmi müəssisənin yaranma tarixi, fəaliyyəti, laboratoriyalarda aparılan elmi tədqiqat işləri, radiasiya və nüvə təhlükəsizliyi, radioekologiya, nüvə enerjisinin dinc məqsədlərlə istifadəsi, eləcə də əldə olunmuş nailiyyətlər və institutun beynəlxalq əməkdaşlıq əlaqələri barədə məktəblilərə məlumat verib.
Sonra institutun radiobiologiya laboratoriyasının böyük elmi işçisi, dosent Cəmalə Orucova “Radiasiyanın bioloji obyektlərə təsirləri” mövzusunda təqdimatla çıxış edib. O, radiobiologiyanın yaranması və bir elm kimi formalaşması, canlı orqanizmlərin radiasiyaya qarşı həssaslığı, onların radiasiyanın zərərli təsirlərinə qarşı davamlılığı və radiasiya şəraitinə uyğunlaşması, həmçinin radiasiyanın yaradacağı fəsadlar və onun zərərli təsirindən mühafizə məsələlərindən danışıb.
Sonra şagirdlər institutun laboratoriyaları ilə tanış olublar.
Bölmənin digər xəbərləri
