MİLLİ MƏCLİS RADİKAL MÜXALİFƏTİN POZUCU MÖVQEYİNİ PİSLƏMİŞDİR
30-da Milli Məclisin növbəti ümumi iclası olmuşdur. İclası parlamentin sədri Murtuz Ələsgərov aparırdı.
Gündəlik təsdiq olunduqdan sonra deputatlar cari məsələlərin müzakirəsinə başladılar. Müzakirələrin əsas mövzusu radikal müxalifət qüvvələrinin ölkədə ictimai-siyasi sabitliyi pozmaq cəhdi olmuşdur. Deputatlar Əli Əhmədov, Məlahət Həsənova, Kərim Kərimov bildirdilər ki, seçicilərdən onlara gələn məktublarda və müraciətlərdə Birləşmiş Müxalifət Hərəkatı deyilən qurumun sabitliyi pozmağa yönəlmiş əməllərinə son qoymaq tələb olunur.
Milli Məclisin sədri Murtuz Ələsgərov deputatların fikri ilə razılaşaraq dedi ki, parlament pozucu müxalifətin fəaliyyətini pisləyir və onun liderlərini qanunlara riayət etməyə çağırır. Xalqın dəstəyindən məhrum olmuş bu qüvvələr ölkədə sabitliyi poza bilməyəcəklər.
Sonra deputatlar “Sağlamlıq imkanları məhdud şəxslərin təhsili (xüsusi təhsil) haqqında” Azərbaycan Respublikası Qanununun tətbiqi ilə əlaqədar Azərbaycan Respublikasının bəzi qanunvericilik aktlarına dəyişikliklər və əlavələr edilməsi barədə” məsələni müzakirə etdilər. Bu məsələ barəsində elm və təhsil məsələləri daimi komissiyasının sədri Şahlar Əsgərov çıxış etdi.
Deputatlar “Nəşriyyat işi haqqında” və “Ahıllara sosial xidmət haqqında” Azərbaycan Respublikası qanunlarının tətbiqi ilə əlaqədar Azərbaycan Respublikasının bəzi qanunvericilik aktlarına dəyişiklikləri və əlavələri də təsdiq etdilər. Müzakirələrdə Milli Məclisin daimi komissiyalarının sədrləri çıxış edərək, müxtəlif qanunvericilik aktlarına dəyişikliklərin və əlavələrin ilkin müzakirəsi barədə məlumat verdilər. Mədəniyyət məsələləri daimi komissiyasının sədri Anar Rzayev və deputat Rəbiyyət Aslanova Kitab palatasının və kitabxanaların vəziyyətindən danışaraq, onları dövlət vəsaiti ayrılması hesabına kitablarla pulsuz təmin etmək təklifini irəli sürdülər.
Fasilədən sonra deputatlar “Dövlət qulluqçularının icbari sığortası haqqında” Azərbaycan Respublikası Qanununun layihəsini (üçüncü oxunuş) müzakirə etməyə başladılar. İqtisadi siyasət daimi komissiyasının sədri Səttar Səfərov öz çıxışında qanun layihəsinin əvvəlki müzakirələrində deputatların irəli sürdükləri təkliflər və qeydlər üzərində dayandı. O bildirdi ki, sənədin son variantına aprelin 22-də komissiyanın iclasında baxılmış, müzakirədə digər daimi komissiyaların sədrləri ilə yanaşı, iqtisadi inkişaf və maliyyə nazirliklərinin nümayəndələri də iştirak etmişlər. Müzakirələrdən sonra qanun layihəsi üçüncü oxunuşda təsdiq olundu.
Bölmənin digər xəbərləri
